Qazaqstannyń ǵarysh salasynyń qazirgi jaǵdaiy, damý múmkindikteri, jańa aeroǵaryshtyq tehnologiialardy engizýi, Baiqońyrdaǵy tarihi ózgerister «Qazaqstandaǵy ǵarysh kúnderi: Baiqońyr – álemdik ǵarysh besigi» atty halyqaralyq forýmda keńinen talqylanyp jatyr. Bul jóninde QR Tsifrlyq damý, innovatsiialar jáne aeroǵarysh ónerkásibi ministrliginiń baspasóz qyzmeti habarlady.
Nur-Sultan qalasynda osymen jetinshi ret uiymdastyrylǵan forým alańynda álemniń 25 elinen kelgen ǵarysh salasynyń 650-den astam sarapshysy bas qosty. QR Premer-Ministri Asqar Maminniń qatysýymen ótken forýmnyń plenarlyq bóliminde Qazaqstannyń ǵarysh júiesiniń jetistikteri men perspektivalary áńgime boldy.
Qazaqstannyń ǵarysh salasyndaǵy basty jańalyqtardyń biri retinde ǵarysh apparattaryn qurastyrý-synaý kesheni qurylysynyń aiaqtalǵany týraly aktige qol qoiylǵanyn aitýǵa bolady. QR Tsifrlyq damý, innovatsiialar jáne aeroǵarysh ónerkásibi ministri Asqar Jumaǵalievtiń aitýynsha, bul keshen otandyq ǵarysh salasyn sapaly jańa deńgeige kótermek.
«Búgingi kúni Qazaqstanda eki telekommýnikatsiialyq spýtnik jumys isteidi. Biz osy saladaǵy múmkindikterimizdi odan ári damytýdy kózdeýdemiz. Keshe ǵana qurastyrý-synaý kesheniniń qurylysy aiaqtaldy, iaǵni 2020 jyly biz óz spýtnigimizdiń jobasyn jasap, óndirýge kirisý arqyly jańa deńgeige kóterilýdi josparlap otyrmyz. Bul - Qazaqstannyń álemdik ǵarysh qaýymdastyǵynyń tolyqqandy múshesi retindegi bastamasy», - dep atap ótti ministr.
Asqar Jumaǵaliev forýmǵa qatysyp otyrǵan Qazaqstannyń strategiialyq seriktesterine, atap aitqanda, «Roskosmos» MK, Airbus, Aziia-Tynyq muhity ǵarysh yntymaqtastyǵy uiymy, OneWeb, Euroconsult basshylyǵyna alǵysyn bildirip, birlesken jobalardy odan ári júzege asyrýǵa daiyn ekendigin jetkizdi.
Budan basqa, Asqar Jumaǵaliev álemdik ǵarysh salasyndaǵy sarapshylarmen ekijaqty kezdesýler barysynda tiimdi «ǵaryshtyq» yntymaqtastyq máselelerin talqylady.
Forýmdaǵy negizgi talqylaýlar «Baiqońyr ǵarysh ailaǵyn damytý», «Ǵaryshtan JDZ jáne spýtniktik navigatsiia tehnologiialary», «Spýtniktik bailanystyń bolashaǵy» baǵyttary boiynsha ótýde. Osy oraida forýmnyń dúniejúzilik ǵarysh qyzmetiniń jetistikterimen bólisip, ozyq tájiribelermen almasýda jáne otandyq ǵarysh salasyn nasihattaýda biregei alańǵa ainalǵanyn aityp ótken jón.
Forýmǵa ministrliktiń strategiialyq seriktesteri - Roskosmos, «Airbus Defence and Space» sondai-aq, otandyq jáne sheteldik uiymdar qatysýda, olardyń ishinde: «M.V. Hrýnichev atyndaǵy memlekettik ǵaryshtyq ǵylymi-óndiristik ortalyǵy», «M.F. Reshetnev atyndaǵy ASJ» AQ, «Transtelekom»AQ, One Web, SES, «Leica Geosystems, Satrec Initiative», «Eutelsat» BAÁ ǵarysh agenttigi, Ýkrainanyń memlekettik ǵarysh agenttigi, japondyq aeroǵaryshtyq zertteýler agenttigi, THALES ALENIA SPACE kompaniiasy jáne taǵy basqalar bar.
