Byltyr 60 jastaǵy Qunanbai Abyraevqa tolyǵymen jasandy júrek salynǵan edi. Araǵa toǵyz ai salyp donor da tabyldy. Patsienttiń ózi de donorlyq júrekke daiyn bolyp shyqty. Osylaisha, Ulttyq ǵylymi kardioxirýrgiia ortalyǵynyń mamandary álem boiynsha alǵash ret bir adamǵa aldymen jasandy júrekti saldy, artynan ony donorlyq júrekpen aýystyrdy, dep xabarlaidy QazAqparat tilshisi.
«Toǵyz ai buryn ol donorlyq júrekke daiyn bolmady. Sebebi baýyr, ókpe jáne taǵy basqa organdarynyń fýnktsiiasy nasharlap ketti. Al jasandy júrekti salǵannan keiin jaǵdaiy jaqsardy, ókpe arteriiasyndaǵy qan qysymy da qalpyna keldi. Osyndaida donorlyq júrekti salýǵa bolady. Sóitip, úsh aidan keiin patsienttiń jaǵdaiy jaqsarǵannan keiin biz donorlyq júrekti izdeýge kiristik», - dedi ortalyq basshysy Iýrii Pia.
Onyń aitýynsha, jasandy júrekti donorlyq júrekpen almastyrý operatsiiasy 12 saǵatqa sozyldy. Álem boiynsha alǵash ret jasalǵan otany shetelden 30 jýyq dáriger kórýge keldi. Qazirgi kezde Qunanbai Abyraevtyń jaǵdaiy jaqsy. Óz kúshimen júrip, turady. Teledidar kórip jatady. Al donorlyq júrekti bir jas jigittiń týǵan-týystary berýge kelisti. Ol qaitys bolǵannan keiin onyń bir emes, birneshe aǵzasyn naýqas adamdarǵa taratyp berdi. «Biz ol jigittiń ata-anasyna myń alǵys aitamyz. Olar júrekti ǵana emes, búirekti de, baýyrdy da berýge kelisti. Osylaisha, bir adam, kem degende, úsh adamnyń ómirin saqtap qaldy», - dep atap kórsetti ortalyq basshysynyń orynbasary Maxabbat Bekbosynova.
Aita keteiik, ótken jyly qarasha aiynda Ulttyq ǵylymi kardioxirýrgiia ortalyǵy 60 jastaǵy er adamǵa jasandy júrek implantantsiiasyn jasaǵan bolatyn. Jasandy júrek - «Carmat SA» atty frantsýz kompaniiasynyń ónimi. Onyń qazirgi baǵasy - 1 mln eýro. Memleket te, ortalyq ta oǵan aqsha jumsaǵan joq. Frantsýz kompaniiasy óz apparatyn synaqtan ótkizip jatyr. Sol sebepti bárin tegin berdi. Sol joly ortalyq basshylyǵy jasandy júrek iesi - Qunanbai Abyraevpen kezdesýge ruqsat berdi. Aǵamyz qýanyshyn jasyra almai, kóz jasyna da erik berdi. «Men qatty aýyrdym. Myna jaqqa kelgende júre almadym, arbaǵa otyrǵyzyp ákeldi. Qazir bári durys... Ózimdi jaqsy sezinemin. Iýrii Pia meniń ekinshi ákem siiaqty. Ortalyq basshylyǵyna myń alǵys... 60 jastan keiin ózimdi osylai sezinemin dep oilaǵan joqpyn», - dedi Qunanbai aǵa. Osy kezde jasandy júrek shiqyldai bastady. Dárigerler oǵan kóp qobaljýǵa bolmaitynyn aityp, patsientti palatasyna alyp ketti.
