Biyl elimizde 9 áýe kemesin satyp alý josparlanyp otyr, dep habarlaidy QazAqparat.
«Bizde ár áýe kompaniiasynyń ushaq satyp alý boiynsha jospary bar. Soǵan sáikes 2025 jylǵa deiin 45-ten astam áýe kemesi alynbaq. Mysaly, biyl «Air Astana» men «FlyArystan» kompaniiasy 2 áýe kemesin aldy. 27 maýsymnan bastap «Air Astana» jáne «FlyArystan»-nyń kestesinde jańa aerobýs paida boldy. Sonymen qatar biyl jyl sońyna deiin atalǵan 2 áýe kompaniiasy taǵy 5 áýe kemesin satyp almaq», - dedi QR IIDM Azamattyq aviatsiia komiteti tóraǵasynyń orynbasary Saltanat Tompieva OKQ-te ótken brifingte.
Onyń aitýynsha, biylǵy jospar boiynsha 9 jańa áýe kemesi satyp alynady.
Odan bólek, brifing spikeri áýe jolaýshylaryn jii tolǵandyratyn reisti keiinge shegerý nemese múldem boldyrmaýǵa qatysty túsinik berdi.
«Belgilengen áýe reisin keiinge qaldyrý - amal qalmaǵan jaǵdaida qabyldanatyn sheshim. Áýe kompaniialary múmkindiginshe jolaýshylaryn dittegen jerge jetkizgisi keledi. Keide áýe reisterin 8 nemese 12 saǵatqa deiin keiinge shegerip jatady. Kóbine reisterdi keshiktirý men boldyrmaýdyń sebebi aýa raiynyń qolaisyzdyǵyna bailanysty. Tuman, qatty jel, boran, taǵy sol siiaqty. Áýe reisi keiinge shegerilgen jaǵdaida kompaniia jolaýshylarǵa tiisti jaǵdaidy jasaýy tiis. Aitar bolsaq, basqa áýe reisterin nemese basqa qala arqyly ushyp barýdy usyný sekildi. Eger jolaýshy tolyq qunyn tolyq qaitarýdy talap etse, onda talap 100 paiyzǵa oryndalýy tiis», - deidi «SCAT» AQ turaqty keste boiynsha kommertsiialyq keshen direktory Nikolai Býriakov.
