Foto: gov.kz
Syrtqy ister ministrliginiń resmi ókili Aibek Smadiiarov senator Darhan Qydyráliniń depýtattyq saýalynda aitylǵan keibir málimetterdi teriske shyǵardy, - dep habarlaidy "Ult aqparat" Kazinform agenttigine silteme jasap.
«Sheteldikter asyrap alǵan bala 18 jasqa deiin Qazaqstan azamaty bolyp qala beredi. Ony bizdiń sheteldegi konsýldar kómektesip, baqylap júredi — arnaiy baǵdarlama bar. Biraq 18-ge tolǵannan keiin ol qai eldiń azamattyǵyn alatynyn ózi sheshýi kerek. Eger 18-den keiin sol eldiń azamattyǵyn alsa, biz eshqandai áreket jasai almaimyz, óziniń jeke sheshimi. Biraq 18 jasqa deiin asyrap alǵan ata-analar konsýlǵa esep berip turýy kerek. Al baǵana siz aityp otyrǵan „birneshe bala týraly aqparat joq“ degen málimet shyndyqqa sáikes kelmeidi. Óitkeni barlyq bala boiynsha aqparat jinap otyramyz. Árine, keibir kezde bir mekenjaidan basqa mekenjaiǵa kóship ketip, aqparat bolmai qalýy múmkin», — dedi Syrtqy ister ministrliginiń resmi ókili.
Onyń aitýynsha, qazaq balalary shetelge alǵash jiberile bastaǵanda «tek batys elderine berilsin» degen talap bolǵan.
«Sonymen qatar „qazaq balalaryn biraz ekzotikalyq elderge alyp ketti“ degen de aqparatty oqydym. Olai emes. Óitkeni bizde kezinde toqsanynshy jyldary „balalardy tek batys elderiniń ókilderine beretin“ talap bolǵan. Batys elderiniń azamattary sol elderde diplomat bolyp jumys isteýi múmkin. Solar asyrap alǵan. Al Afrika elderine biz balalardy bermeimiz», — dedi Aibek Smadiiarov.
SIM resmi ókili qazirgi tańda 18 jasqa deiingi 1993 bala konsýldyq esepte turǵanyn jetkizdi.
«Senator Darhan Qydyráli júzden asa balany Afrika elderine asyrap alyp ketti dedi. Ol aqparat ótirik pe?» dep naqtylady BAQ ókili.
«Ol aqparatty qaidan alǵanyn bilmeimin. Bizdegi bar málimetke sáikes, Afrika elderine bala bergen joqpyz. Shyndyqqa janaspaidy», — dedi Aibek Smadiiarov.
Eske salsaq, senator Darhan Qydyráli Ońtústik Afrika eline ketken 30 baladan habar-oshar joq ekenin málim etken.
