Qazaqstan sońǵy 2 apta boiy koronavirýs infektsiiasynyń taralý táýekeli joǵary aimaqta tur. Bul týraly QR Densaýlyq saqtaý vitse-ministri Marat Shoranov aitty, dep habarlaidy QazAqparat.
«Osy jyldyń 14 sáýirindegi jaǵdaiǵa sáikes, Qazaqstanda koronavirýstyń oń nátijesimen 270 myńnan astam, PTR teris nátijesimen 51 myńnan astam naýqas tirkelgen. Epidemiologiialyq ahýaldy baǵalaý matritsasyna sáikes, Qazaqstan Respýblikasy 14 kún boiy táýekeli joǵary, iaǵni, qyzyl aimaqta tur. Sonymen qatar táýekel joǵary aimaqqa elimizdiń 8 óńiri kiredi», - dedi Marat Shoranov Ortalyq kommýnikatsiialar qyzmetindegi brifing barysynda.
Ol sońǵy bir ai boiy Nur-Sultan men Almaty qalalary qyzyl aimaqta turǵandyǵyna nazar aýdartty.
«Sáýir aiynda epidemiologiialyq ahýaldyń nasharlaǵany baiqalady. Sáýir aiynyń basynyna beri 29 200 jaǵdai tirkeldi. Naýryz aiymen salystyrǵanda 2,8 esege jýyq ósim bar. Qostanai, Pavlodar, Soltústik Qazaqstan oblystaryn qospaǵanda barlyq óńirde aýrý ósimi baiqalady. Buǵan qosa, naýqastardyń 60 paiyzy Nur-Sultan, Almaty qalalarynda jáne Almaty oblysynda tirkelgen», - dedi vitse-ministr.
