Foto: Offside.kz
Qazaqstandyq videograf, trevel-bloger ári burynǵy qazaq tili muǵalimi Dastan Muhamedrahim halyqaralyq WIBA Awards 2026 syilyǵynyń «Úzdik trevel-bloger» nominatsiiasy boiynsha jeńimpazy atandy dep habarlaidy Ult.kz.
Atalǵan marapat internet-jobalar álemindegi «Oskar» retinde jii atalady. Dastannyń blogy Qazaqstan tabiǵatyna arnalǵan. Búginde onyń Instagram paraqshasyna 1,6 million adam jazylǵan. Ol iri kompaniialarmen yntymaqtastyq ornatyp, blogerlerdiń jahandyq sammitterine qatysyp, eldiń kórikti jerlerin álemge tanytyp júr.
Blogerdiń aitýynsha, 20 qańtar kúni oǵan Instagram-nyń resmi paraqshasynan hat kelgen. Onda WIBA Awards syilyǵynyń Year in Review (jyl qorytyndysy) nominatsiiasyna úmitker atanǵany habarlanyp, qatysýǵa kelisim berý suralǵan. Dastan usynysty qabyldaǵan, al 15 aqpanda oǵan jeńimpaz atanǵany týraly habarlama kelgen.
Jeńimpazdardy irikteý kórilim sany, vizýaldyq estetika jáne kontenttiń kreativtiligi siiaqty birqatar kórsetkishter negizinde júrgiziledi. WIBA Awards 2026 marapattaý rásimi 2026 jylǵy 22 mamyrda Kann qalasynda ótedi.
Dastan Muhamedrahim baiqaýǵa tek Qazaqstanda túsirilgen videolarmen qatysqanyn atap ótti. Onyń aitýynsha, ol «Bul – kez kelgen el emes, bul – Qazaqstan» degen formattaǵy trendti bastaǵan. Máselen, «Bul Kanada emes, bul – Qazaqstan» degen mazmundaǵy rolikter arqyly el tabiǵatyn erekshe qyrynan kórsete bildi.
Qazir bul formatty sheteldik blogerler de keńinen qoldana bastaǵan. Mysaly, Indoneziiadan bir bloger osy stilde video jariialap, 6 million qaralym men 700 myń laik jinaǵan. Videonyń basynda «Bul Qazaqstan ba?» degen suraq qoiylyp, sońynda onyń óz eli ekeni kórsetiledi. Dastannyń pikirinshe, bul format búginde jahandyq trendke ainalǵan.
