Prezident Almaty oblysynyń turǵyndarymen kezdesýinde memleketimiz turaqty damýy úshin azamattarymyz básekege qabiletti bolýy kerektigin aityp, zamanǵa sai mamandyq alýǵa, eńbek pen bilim kýlti ornyqqan qoǵamǵa ainalýǵa úndedi. Sondai-aq álem halyqtarynyń jaqsy qasietterin boiǵa sińirip, jaqsy úrdisterin úirený úshin til bilý qajet ekenin eske saldy, dep habarlaidy "Ult aqparat" Aqordanyń resmi saityna silteme jasap.
"Babalarymyz «Jeti jurttyń tilin bil, jeti túrli ilim bil» dep aitqan. Shyn máninde, jastar neshe til bilse, aldynan sonsha eldiń esigi aiqara ashylady. Bul týǵan elińniń múddesine qyzmet etý úshin qajet. Degenmen, eń aldymen, jastarymyz ana tilin – qazaq tilin bilýi kerek. Ana tilimiz birinshi orynda bolyp, bárimiz úshin negizgi basymdyq bolýy qajet. Solai bolady da dep atap aitqym keledi. Jalpy, biz tilimiz damymai jatyr degen oidan arylýymyz kerek. Táýelsizdik kezeńinde onyń mártebesi biiktemese, tómendegen joq. Qanshama aqparat quraldary habar taratady. Gazet-jýrnaldar, kitaptar shyǵyp jatyr. Qazaqsha sóileitin jastar kóbeiip kele jatyr. Jalpy, tildik orta túbegeili ózgerdi. Qazaq tilin biletin ózge ult ókilderi de az emes. Soǵan sáikes qazaqsha filmderge, ánderge jáne basqa da ónimderge degen suranys joǵary. Munyń bári qazaq tilin qoldaný aiasy jyldan-jylǵa keńeiip kele jatqanyn kórsetedi. Sondyqtan alańdaýǵa esh negiz joq. Qazaq tilin paidalanyp, saiasi oiyndar júrgizýdiń qajeti joq. Osyndai teris túsinikter keibir elderdi qasiretke ushyratty. Memleket qazaq tilin qoldaý úshin tiisti sharalar qoldanyp jatyr. Bul baǵyttaǵy jumysty jalǵastyra beremiz. Óz tilimizdi ózimiz ulyqtaýymyz kerek. Bul – óte durys. Biraq ózge tilden bas tartýǵa bolmaidy. «Óz tiliń birlik úshin, ózge til tirlik úshin» degen sóz bar. Biz til saiasatyn baiyppen júrgizýimiz kerek", – dedi Memleket basshysy.
