Foto: QR Mádeniet jáne aqparat ministrligi
Almatyda QR Mádeniet jáne aqparat ministrliginiń qoldaýymen «Túbi bir túrki ádebieti» atty dóńgelek ústel ótti. Oǵan Qazaqstan Jazýshylar odaǵynyń tóraǵasy Mereke Qulkenov, Ózbekstan Jazýshylar odaǵy tóraǵasynyń orynbasary Minhodjiddin Hojimatov, eki eldiń tanymal qalamgerleri qatysty, dep habarlaidy Ult.kz.
Kezdesýdiń negizgi taqyryby – ádebi bailanysty nyǵaitý jáne ádebiettiń oqyrmandarǵa yqpaly. Qazaq pen ózbek halqynyń ádebieti men mádenieti tereń tarihi jáne rýhani bailanysqa ie ekeni barshaǵa málim. Bul jaqyndyqtyń qainar bastaýy ortaq túrkilikte jatqany belgili. Qazirgi ýaqytta da bul úrdis jalǵasýda. Qazaq pen ózbek ádebietiniń jańa býyn ókilderi shyǵarmalaryn bir-birine aýdaryp, ádebi bailanystardy nyǵaitýda.
Ózbekstannan kelgen delegatsiia QR Ulttyq kitaphanasyn aralady. Sirek kitaptar men qoljazbalar qyzmetinde arnaiy kórme uiymdastyrylyp, qonaqtar qorda saqtalǵan biregei muralarmen tanysty. Olardyń qatarynda XVIII ǵasyrdaǵy Quran, Qoja Ahmet Iasaýidiń «Risala» (XVI ǵ.), «Diýani Hikmet» (XIX ǵ.), «Hikmet Hazretii» (XVIII ǵ.), sondai-aq onyń ata-tegi týraly tarihi shejire «Nasabnama» (XVII ǵ.) jáne shákirti Súleimen Baqyrǵanidyń «Hikmetteri» bar.
Foto: QR Mádeniet jáne aqparat ministrligi
Sonymen qatar shyǵys ádebietiniń jaýharlary – Nizami Gánjaýidiń «Hamsa» (XV ǵ.), Álisher Naýaidiń «Diýany» (XVII ǵ.), Ábilqasym Firdoýsidiń «Shahnamasy» (XVIII ǵ.) da erekshe nazarǵa ilikti.
Is-shara aiasynda Ózbekstannyń ádebieti men mádenietine arnalǵan kitap kórmesi uiymdastyryldy.
Ózbekstan Respýblikasynan kelgen delegatsiia quramy men qazaq qalamgerleri qazaqtyń bas aqyny Abaidyń eskertkishine taǵzym etip, gúl shoqtaryn qoidy. Sonymen qatar, akademik, klassik jazýshy Muhtar Áýezovtiń mýzei-úiine baryp, tarihi jádigerlermen tanysty.
Aita keteiik, buǵan deiin Túrkistanda Qazaqstan men Ózbekstannyń belsendi jastarynyń qatysýymen «Dostyq kópiri» forýmy ótken bolatyn. Forýmda jumysshy mamandyqtardy nasihattaý jáne eńbek naryǵyna jasandy intellekttiń áseri sekildi máseleler talqylandy.
