Qazaq dalasyndaǵy kiikter tóldei bastady. Jańa týǵan quralaidyń fotosýretteri jelide jariialandy, dep habarlaidy "Ult aqparat".
«Búgingi kúndi súiinshi suraýdan bastaǵym keledi. Birneshe kún buryn kiikter tóldei bastady. Kóktemniń alǵashqy quralailaryn kórińizder. Tuqym jalǵastyrý – árbir tirshilik iesi úshin mańyzdy kezeń», - deidi fotosýretterdi jelide bólisken Orman sharýashylyǵy jáne janýarlar dúniesi komitetiniń baspasóz hatshysy Sáken Dildahmet.
Jańa týǵan tól endi tirshiliktiń synynan ótýi tiis. Álsizi ólse, keibiri jyrtqyshtardan aman qalmaidy. Tek myqtysy tirshiligin jalǵastyrady. Tabiǵat zańy osyndai.
«Jyl saiyn mamyr aiynyń basynda kiikter tóldeidi. Tóldeý ýaqyty birneshe aptaǵa ǵana sozylady. Jyl saiyn dál osy ýaqytta kún buzylyp, salqyndaidy, jel turady. Halqymyz ol ýaqytty «Quralaidyń salqyny» dep ataidy. Tóldeý kezinde kiiktiń erkegi olardy ainala júrip, jyrtqyshtardan qorǵaidy. Al Ohotzoopromnyń inspektorlary men Orman sharýashylyǵy jáne janýarlar dúniesi komitetiniń aýmaqtyq departamentteri de kiikterdi brakonerlerden qorǵaidy», - deidi komitet ókili.
