Doping daýy sportshylar men jankúierler qaýymynyń tynyshyn ketirdi. Álemdegi nebir sport sańlaqtary jeńgen júldesin keri qaitaryp, ókinishten ózegi órtenip jatyr. Qazaq sportshylary da doping dúrbeleńinen ainalyp óte almady.
Keshe ǵana bes birdei sportshymyz Halyqaralyq Olimpiada komiteti jariialaǵan "qara tizimge" ilikti. Iaǵni, olarǵa 2008 jyly Beijińde ótken Olimpiada oiyndarynda doping qoldandy degen aiyp taǵylyp otyr. Atap aitsaq, tizimde birneshe kún buryn belgili bolǵan qazaqstandyq aýyr atlet Irina Nekrasova (kúmis), Mariia Grabovetskaia (qola), erkin kúresten Áset Mámbetov (qola) pen birge aýyr atlet Vladimir Sedov ta (tórtinshi oryn) bar eken. Sondai-aq ziltemirshi Maiia Manezanyń da doping qoldanǵany resmi túrde rastaldy.
Taǵy bir ókinishtisi, buǵan deiin Svetlana Podobedova, Zúlfiia Chinshanlo jáne Maiia Maneza da 2012 jylǵy Olimpiada medaldarynan aiyrylǵan edi. Tipti Beijińde kúmis alǵan Teimýraz Tigiev te júldesin keri qaitaratyn bolǵan-dy.
Taǵy bir mańyzdy másele, qazaqstandyq aýyr atletter Ilia Ilin men Almas Óteshovke qatysty sheshim áli shyqqan joq. HOK oǵlandarymyzdy aldaǵy ýaqytta qalai jazalaityny ázirge beimálim.
Bireýdiń tutylǵany ekinshi bireýdiń qýanyshyna bastaidy. Doping qoldandy delingen jeńimpaz júldesinen airylsa, onyń sońyndaǵy sportshy aiaq asty jańa ataqqa ie bolady. Kesheli beri qazaq balýany Nurbaqyt Teńizbaevtyń Beijiń Olimpiadasynyń kúmis medalin alýy múmkin ekeni jii jazyla bastady. Jerlesimizdi jartylai finalda jeńgen ázirbaijandyq Vitalii Ragimovtyń doping qoldanǵany jaily derekter paida boldy. Alaida qazaq balýany bul "jańalyqty" salqynqandylyqpen qabyldaǵan sekildi. Bizdiń batyr óziniń qola júldesiniń qanshalyqty ystyq ekenin aityp, kúmistiń ázirbaijan balýanyna tiesili ekenin jazady.
"Pekin Olimpiadasy men úshin sporttyq kareramnyń shyńy boldy. Árbir sportshy Olimpiada oiyndarynyń jeńimpazy nemese júldegeri bolǵysy keletini anyq. Sportta uzaq ýaqyt júrip, eshqashan jeńildiń astymen aýyrdyń ústimen júrgendi qoldamaitynmyn jáne qoldamaimyn da. Qandai medal bolsyn ony kilem ústinde jeńip alǵandy qoldaimyn. Dál sol kúni, meni Ázirbaijan balýany Vitalii Ragimov utqan bolatyn, Vitaliidi talantty da myqty balýan retinde tanimyn. Sol kúni úshinshi oryn ielený meniń mańdaiyma jazylǵan bolar, maǵan ózimniń utqan qola medalym asa qymbat. Kúmis Vitaliige jáne onyń januiasyna tiesili. Ol medaldyń artynda kóptegen adamnyń eńbegi jatyr. Kúmis sol eńbektiń jemisi dep oilaimyn! Sizderdiń jyly lebiz jáne qoldaýlaryńyzǵa úlken alǵys aitamyn", - deidi ol óz jazbasynda.
Qalai bolǵanda da, bul taqyrypqa qatysty naqty sheshim aldaǵy ýaqyttyń enshisindegi dúnie. Áliptiń artyn baǵaiyq.
Ult portaly
