Taiaýda Qyrǵyz Respýblikasynyń Balyqshy qalasynda TMD elderi dostastyq armiialary arasyndaǵy II áskeri-sporttyq oiyndary ótti.
«Edelveis» oqý ortalyǵynyń bazasynda ótken oiyndarǵa Armeniia, Belarýs, Qazaqstan, Qyrǵyz, Tájikstan Respýblikalary men Resei Federatsiiasynan 300-den astam áskeri qyzmetshi qatysty. Olar armiialyq qol jekpe-jegi urysy, gir sporty, áskeri-sporttyq keshen kópsaiysy, ofitserlik úshsaiys jáne tabeldik qarýdan atý boiynsha medaldar jiyntyǵyn sarapqa salady. Oiyndardyń ashylýyna qatysqan Qyrǵyz Respýblikasy Qarýly Kúshteri Bas shtaby bastyǵynyń birinshi orynbasary Kýbanychbek Orozmatov jarysqa qatysýshylarǵa sáttilik pen jeńister tiledi.
Sonymen qatar, osyndai is-sharalardyń memleketter arasyndaǵy áskeri yntymaqtastyqty damytý men nyǵaitýdyń jarqyn mysaly ekenin atap ótti. Oiyn barysynda elimizdiń áskeri qyzmetshileri aldaryna jan salmai, jeńimpaz atanǵandary da bar. Mysaly, TMD elderi dostastyq armiialary arasynda ótken II áskeri-sporttyq oiyndar sheńberinde Qazaqstan Qarýly Kúshteriniń áskeri qyzmetshileri armiialyq qol jekpe-jegi urysy boiynsha ózgelerden ozyq kórindi.
Sóitip, 65 keli salmaq dárejesinde finaldyq básekede qyrǵyz sportshysy Rústem Ibragimovty jeńgen serjant Áli Battal jeńimpaz atandy. Tájik Hýsein Mýminshoevtan basym túsken aǵa leitenant Vadim Fedoseev qurama qorjynyna taǵy bir altyndy saldy. 80 keli salmaqqa deiingi dárejede synǵa túsken aǵa leitenant Jasulan Múserkenov chempion atansa, 85 kelige deiingi salmaq dárejesinde óner kórsetken taǵy bir qazaqstandyq áskeri qyzmetshi serjant Arman Ermenbet finaldyq básekede qyrǵyz sportshysynan basym túsip, el qorjynyndaǵy altyn sanyn arttyrdy. Sonymen qatar, Qazaqstan qurama komandasynyń qorjyny qola medaldarmen de tolyqty. 60 kelige deiingi salmaq dárejesinde efreitor Erzat Seterbaev, 58 keliden joǵary salmaq dárejesinde aǵa serjant Jaqsybek Shynyqulov qola júldeger atandy.
«Biz bul jarysqa birneshe ai boiy daiyndaldyq. Oqý-jattyǵý protsesi Panfilov aýylyndaǵy AOSK bazasynda ótti. Ol jerde áskeri qyzmetshiler taktikalyq jaýyngerlik tájiribe jinaqtaý, fizikalyq tózimdilik men rýh kúshin nyǵaitý boiynsha baǵa jetpes tájiribe jinaqtai aldy. Jattyǵýlar kúnine úsh ret ótkizilip turdy. Jattyǵý protsesi sportshylarǵa da, jattyqtyrýshylarǵa da ońaiǵa túsken joq. Osyndai jemisti jumystardyń nátijesinde búgingi jeńiske qol jetkizip otyrymyz», - deidi komanda jattyqtyrýshysy kapitan Oljas Aqbaev.
Jalpy komandalyq esepte Qazaqstan quramasy jeńimpaz atanyp, kýbokty ielense, Resei Federatsiiasynyń áskeri qyzmetshileri ekinshi orynda turaqtady. Úshinshi oryn Qyrǵyz Respýblikasy qurama komandasynyń enshisinde.
