Qazaqstannyń jas ánshisi Ernar Sadyrbaev «Slavian bazary» halyqaralyq baiqaýynda birinshi oryndy ielendi, dep habarlaidy "Ult aqparat".
Buǵan deiin habarlaǵanymyzdai, baiqaýdyń birinshi kúniniń qorytyndysy boiynsha, «Ámre» atymen belgili - Ernar Sadyrbaev finaldyq kezeńge ótken bolatyn. Jalpy, biyl baiqaýǵa 21 adam qatysqan. Shirek finaldan soń 15 úzdik irikteldi.
23 jastaǵy Ernar Sadyrbaev áýeli Nurǵisa Tilendievtiń «Qustar ánin» shyrqady. Ekinshi kúni orkestrdyń súiemeldeýimen Raian Poýstyń «Podberi mýzyký» jáne Rokopera Motsarttyń «Ia spliý na rozah» atty shyǵarmalaryn oryndady.
Sonymen, jiyrma jetinshi ret ótkizilgen halyqaralyq óner festivaliniń Gran-pri júldesi Rýmyniianyń ánshisi Marchel Roshkaǵa buiyrdy. Al «Ámre» birinshi orynǵa ie boldy. Aita keteiik, Roshka men «Ámreniń» upailary birdei - 156. Alaida, qazylar alqasynyń tóraǵasy Aleksandr Morozovtyń sheshimimen bas júlde rýmyniialyqqa berildi. Ekinshi oryndy Ýkraina, úshinshi oryndy Polsha men Belarýs elderiniń ánshileri aldy. Atalǵan festivalde Qazaqstannyń Halyq ártisi Roza Rymbaeva men ánshi Dimash Qudaibergen tórelik etti.
Eske salsaq, Dimash Qudaibergen 2015 jyly Vitebskide ótken «Slavian bazary» halyqaralyq án festivalinde bas júldeni ielengen bolatyn.
Bul Ernar Sadyrbaevtyń halyqaralyq dárejedegi ekinshi iri jeńisi. Buǵan deiin Praga qalasynda ótken eki birdei halyqaralyq án baiqaýynan Gran-Pri júldesin utyp alǵan edi.
