Aqyn, QR Jazýshylar odaǵynyń tóraǵasy Ulyqbek Esdáýlet Qazaq ádebietin damytý tujyrymdamasyn jasaý bastamasyn kóterdi, dep habarlaidy QazAqparat.
Bul usynys Májiliste Áleýmettik-mádeni damý komitetiniń «Jańa ulttyq biregeilikti qalyptastyrýdaǵy shyǵarmashylyq odaqtar men qoǵamdyq uiymdardyń róli» taqyrybyndaǵy dóńgelek ústel otyrysynda aityldy.
«Táýelsizdik alǵanymyzǵa 30 jyl toldy. Bul aralyqta jańa urpaqqa jańa erejeler qajet ekenin túsindim. Bizde qazirgi zamanaýi filosoftar joq. Biz indýstriialandyrýdyń tórtinshi baǵdarlamasyn júzege asyratyn ýaqytta ómir súrýdemiz jáne ókinishke qarai, rýhani salada utylyp kelemiz. Elimiz ekonomikalyq reformaǵa kóship jatyr, biraq mádenietke, rýhani salaǵa qoldaý az, sol sebepti qoǵamymyzda rýhani daǵdarys boldy. Sybailas jemqorlyq jáne basqa da qoǵamdaǵy keleńsiz qubylystar bizdiń rýhani damýymyzǵa yqpal etti, sondyqtan jas urpaqtyń mádeni damýy artta qalyp keledi. Ókinishtisi, biz keibir qundylyqtardy joǵaltyp aldyq. Elimizde Qazaq ádebietiniń jaǵdaiy máz emes, sebebi qoldaý joq. Árine, sońǵy ýaqytta kitaphana qorlary tolyqty, biraq aýdandyq nemese aýyldyq eldimekenderge jańa kitaptar jetpeidi», - dedi U. Esdáýlet.
Onyń aitýynsha, rýhani damýdy qalyptastyrý – basty mindet bolýy kerek jáne ulttyq biregeilik úshin eń aldymen, mádenietti damytý qajet.
«Bul – qysqa merzimde ózgertýge bolatyn qubylys emes, oǵan ýaqyt kerek. Jastarǵa eńbeksúigishtiktiń jańa qasietterin úiretýimiz kerek. Ádebiettegi basty qarý – til. Demek, jastar ana tilinde sóileýi qajet. Olar birneshe tildi bilýi múmkin, biraq eń aldymen ana tilinde sóilep úirenýi tiis. Sondyqtan qazaq tilindegi mýltfilmder arnasyn ashyp, álemdik mýltfilmderdi qazaq tiline aýdarý kerek. Árine, biz jahandanýdan qorqatynbyz, biraq jahandaný bizge baiaǵyda keldi. Qazir kishkentai balalar qazaqsha emes, sheteldik ónimderdi kóp kóredi, bul bizdiń ideologiiamyzǵa óte ziian. Biz úshin eń bastysy – óskeleń urpaqtyń ana tilinde bilim alýy, odan ári basqa tilderdi oqyp, básekege qabiletti bolýy. Munyń bári oqýlyqtarǵa, mádenietke, ónerge jáne eń aldymen tilge bailanysty. «Baspasóz týraly» zań qabyldap, Qazaq ádebietin damytý tujyrymdamasyn jasaý qajet. Mundai tujyrymdamalar bizdiń kórshilerimizde de bar. Sosyn Ulttyq biregeilikti damytý týraly tujyrymdama qabyldaýdy usynamyn», - deidi U. Esdáýdet.
