«QazAgro» holdinginde qyzmetkerlerdi qysqartý júredi. Búgin QR Parlamenti Senatynyń jalpy otyrysynda Aýyl sharýashylyǵy ministri Saparhan Omarov osylai málim etti, dep habarlaidy QazAqparat.
«Búginde «QazAgronyń» qaryzy bar ekenin barshańyzǵa belgili. Atap aitqanda, aýyl sharýashylyǵyn qoldaýǵa baǵyttalyp jatqan qarjy «QazAgro» qaryzyn jabýǵa bólinbeidi. Bul qarjy birden «QazAgronyń» enshiles kásiporyndaryna jiberiledi jáne olar arqyly taýar óndirýshiler nesielendiriledi», - dedi ministr.
Sonymen qatar ol «QazAgro» bereshegin jabý boiynsha qaita qurylymdaý men holdingti reformalaý iske asyrylyp jatqanyn atap ótti.
«Eger buryndary «QazAgro» qurylymynda jetige jýyq enshiles kásiporyn bolsa, al taldaý nátijesi boiynsha enshiles úsh kásiporyndy jabamyz. Iaǵni eki kásiporyn jabylsa, bereýin – «QazAgroKepildi» «Agrarlyq nesielik korporatsiiasymen» biriktirý eskerilgen. Sebebi olardyń qyzmetteri birin-biri qaitalap tur», - dep túsindirdi S. Omarov.
Ministriń atap ótýinshe, «QazAgro» ortalyq shtatynda qysqartý júredi.
«Reformalar nátijesinde, shamamen 1,1 myń holding qyzmetkerin qysqartýdy josparlap otyrmyz. Osynyń esebinen 3,2 mlrd teńgeni únemdeý eskerilgen», - dedi vedomstvo basshysy.
Budan buryn habarlanǵandai, «QazAgro» holdingi óz qyzmetin reformalaý nátijesinde 2020 jyldyń qorytyndysy boiynsha taza paidaǵa shyǵýdy josparlap otyr.
