Qazaqstandyqtar otandyq jáne sheteldik tanymal sýretshilerdiń kartinasyn satyp alý arqyly, qaiyrymdylyq is-sharaǵa óz úlesterin qosa alady, dep habarlaidy QazAqparat.
«Maǵan kórme uiymdastyrý arqyly sút bezi qaterli isigine shaldyqqan áielderdi qoldaý ideiasy keldi. Sebebi osy aýrýdyń kesirine ájemnen aiyryldym. Jáne meniń jan qurbym da osymen aýyryp shyqty. Qurbyma dert óte qiyn soqty, árine men bar qoldaýymdy aiamadym. Taǵy bir másele qazirgi áielder sút bezi qaterli isiginiń qanshalyqty qaýipti ekenine asa mán bermeidi. Mysaly, Eýropada áielder mindetti túrde jylyna 2 ret mammografiia tekserýinen ótedi. Olar úshin bul qalypty jaǵdai jáne aýrýdyń aldyn alady», - dedi «KULANSHI» zamanaýi óner ortalyǵynyń direktory, kórmeni uiymdastyrýshy Leila Mahat.
Kórmede qazaqstandyq sýretshiler Sáýlet Jánibek, Leila Mahat jáne Sofiia Teiderdiń týyndylary, odan bólek sýretshi Ron di Szenza (Italiia), Hannan Milner (Izrail), Olga Oreshnikova (Izrail) eńbekteri satylymǵa qoiyldy.
«Meniń sýret salýdaǵy janrym negizinen siýrrealizm. Karantin kezinde úide otyryp jańa baǵytty qolǵa alyp kórdim. Osylaisha portretti tańdadym. Sonyń nátijesi búgingi kórmege qoiylyp otyr. Kartinanyń ataýy «Ánel» bul meniń dosymnyń 7 jasar qyzynyń potreti. Sýretti salýǵa 3-4 kún ýaqyt jumsaldy», - dedi otandyq sýretshi Sáýlet Jánibek.
