QR Indýstriia jáne infraqurylymdyq damý birinshi vitse-ministri Qaiyrbek Óskenbaev Arys qalasynda úilerdi qalpyna keltirý jumystarynyń sapasyzdyǵyna qatysty aqparattarǵa túsinik berdi, dep habarlaidy QazAqparat.
«Biz turǵyndardan qurylys jumystaryna alańdamaýyn suraimyz. Birde-bir sheneýnik jumysyn aiaqtamai qaladan ketpeidi. Osy ýaqyt ishinde biz sizdermen birge boldyq jáne kún saiyn 17 sektordyń árqaisysyn tekserip otyramyz. Ol úshin QR Prezidenti Qasym-Jomart Toqaevtyń naqty tapsyrmasy bar. Buǵan qosa, QR Premer-Ministri Asqar Mamin qalany qalpyna keltirý jumystarynyń barysymen tanysý maqsatynda apta saiyn Arysqa is-sapar jasap, ony tikelei baqylaýynda ustaýda», - dep atap ótti Qaiyrbek Óskenbaev.
Onyń aitýynsha, Arys qalasynda jóndeý jumystary kezeń-kezeńimen júzege asyrylady.
«Aldymen, ýchaskede shatyr aýystyrylady. Odan keiin mamandar terezelerdi salady. Budan ári jumysqa árleýshiler kirisedi. Árbir maman óz jumysyn oryndap, tapsyrady. Onyń sońynan kelesi maman iske kirisedi. Iaǵni, úilerdiń qurylysy men qalpyna keltirý jumystarynyń barlyq kezeńi udaiy baqylaýda. Qalany qalpyna keltirýge rekordty kólemde qurylysshylar jumyldyryldy. Qajetti materialdar jetkilikti mólsherde úzdiksiz jetkizilip, barlyq 17 shtab kúsheitilgen kestede jumys istep jatyr», - dedi birinshi vitse-ministr.
Qaiyrbek Óskenbaevtiń sózinshe, qurylysshylardyń úilesimdi jumysynyń arqasynda qysqa ýaqytta aýqymdy jumystar atqaryldy.
Búgingi tańda Arystaǵy 6,7 myńnan astam úide negizgi qalpyna keltirý jumystary aiaqtaldy. 2,6 myń jeke jáne kópqabatty turǵyn úide qurylysshylar kosmetikalyq jóndeý júrgizýde.
