Qazaqstandyqtar airyqsha qorǵalatyn tabiǵi aýmaq – Qaiyńdy kóliniń ortasynda úrlemeli matrasta júzgen qyzdyń beineroligin qyzý talqylaýda. Ekologiia ministrligi video avtorlarynyń jazalanatynyn aitty, dep habarlaidy "Ult aqparat".
«Barlyǵyna qoiylatyn jalpy talap – erekshe qorǵalatyn tabiǵi aýmaqtarda júrý tártibin buzýǵa bolmaidy. Qarapaiym erejelerdi buzǵany úshin QR ÁQBtK-niń 380-babyna sáikes eskertý nemese aiyppul qarastyrylǵan. Dostar, munyń bári óte mańyzdy. Jaýapqa tartýdan basqa, jazataiym oqiǵalar bolýy múmkin. Nelikten qorshaǵan ortaǵa, onyń biregeiligine ziian keltirý kerek?!», - dep jazdy Ekologiia, geologiia jáne sý resýrstary ministrliginiń baspasóz hatshysy Samal Ibraeva Facebook jelisinde.
Onyń aitýynsha, inspektorlar rolik avtorlaryna qatysty quqyqbuzýshylyq hattamasyn toltyryp jatyr.
«Týristerdiń qyzǵylt Kóbeituz kólimen ne istegenin eske túsireiik. Onda adamdar biregei sý qoimasyna kóliktermen kirip, qoqys tastap, tabiǵi tuzdy alyp ketti. Ókinishke orai, tabiǵatqa osyndai varvarlyq jasaý jaǵdaiy qaitalanýda. Bul ulttyq saiabaqtarda infraqurylymnyń, órkenietti tásildiń jáne EKO týrizmniń mańyzdy ekenin taǵy da dáleldeidi. Áitpese, mundai «jabaiy» týrizm tek kóbeie beredi», - dep pikir bildirdi S. Ibraeva.
Ministrlik ókili qazaqstandyqtarǵa úndeý jasady.
«Týristik maýsym bastalyp jatyr. Bizdiń Qazaqstanda ádemi tabiǵaty bar kóptegen oryndar bar, olarǵa barý óte mańyzdy. Qazaqstannyń tabiǵaty esh jerde qaitalanbaidy! Sońǵy jyldary kóptegen adamdardyń elimizdi jańa qyrynan ashqany qýantady. Biraq! Bizdiń ortaq mindetimiz – jalpy qabyldanǵan normalar men erejelerdi saqtaý. Tabiǵatty qorǵap, óskeleń urpaqqa patriotizm men janýarlarǵa, ósimdikterge, ormanǵa, taýlarǵa degen súiispenshilikte tárbieleiik!», - deidi baspasóz hatshysy.
