Foto: RBK
Qazaqstanda zańsyz iemdenilgen aktivterdi qaitarý esebinen áleýmettik nysandar salý jumystary jalǵasyp jatyr. Arnaýly memlekettik qordan Abai oblysyna densaýlyq saqtaý salasyndaǵy jobalardy júzege asyrýǵa 5,6 mlrd teńge bólindi, dep habarlaidy Ult.kz.
Qarajat óńirdegi infraqurylymdy jaqsartýǵa jáne meditsina sapasyn arttyrýǵa baǵyttalǵan.
Úrjar aýylynda bul qarajat kópsalaly ortalyq aýdandyq aýrýhanaǵa qosymsha korpýs salýǵa jáne zamanaýi meditsinalyq tehnikamen jaraqtandyrýǵa jumsalýda.
Aiagóz qalasynda bólingen qarajatqa kópsalaly ortalyq aýdandyq aýrýhanaǵa qosymsha korpýs salynyp jatyr, onda magnittik-rezonanstyq tomograf ornatylady.
Nysandardy biyl paidalanýǵa berý josparlanyp otyr. Jobalar azamattardy ýaqtyly jáne sapaly meditsinalyq qyzmettermen qamtý aiasyn keńeitýge múmkindik bermek.
Buǵan deiin Arnaýly memlekettik qordan Semei qalasynda 100 oryndyq meditsinalyq-áleýmettik psihonevrologiia mekemesin salýǵa 2,6 mlrd teńge bólingen bolatyn.
Esterińizge sala ketsek, «Jasandy intellekt dáýirindegi Qazaqstan: ózekti máseleler jáne ony túbegeili tsifrlyq ózgerister arqyly sheshý» atty Qazaqstan halqyna Joldaýynda Prezident Qasym-Jomart Toqaev memleket densaýlyq saqtaý salasyn damytý úshin júieli túrde kúsh-jiger jumsap kele jatqanyn atap ótken bolatyn.
Elimizde meditsinalyq nysandardyń barlyq spektri – aýyldyq feldsherlik-akýsherlik pýnktterden bastap mamandandyrylǵan aýrýhanalarǵa deiin birtindep jańǵyrtylýda. «Aýylda densaýlyq saqtaýdy jańǵyrtý» ulttyq jobasy aiasynda 540 nysannyń qurylysy salyndy.
