«Astana» halyqaralyq qarjy ortalyǵynyń basqarýshysy Qairat Kelimbetov daiyndyq jumystary jaiynda aityp berdi. 5 shilde kúni ortalyqtyń resmi ashylýy ótedi, dep xabarlaidy QazAqparat tilshisi.
«Esterińizde bolsa, ótken aptada men 1 shildege deiin 50-ge jýyq kompaniianyń tirkeletini jaiynda aitqan edim. Búgin jaqsy jańalyqpen bóliskim kelip otyr. Osy ýaqytqa deiin 55 kompaniia tirkelip úlgerdi. Jyldyń aiaǵyna deiin 100 kompaniia tirkeledi degen jospar bar. Demek, jospardyń jartysy oryndaldy. Álemdik qarjy uiymdary tarapynan qyzyǵýshylyq bar», - dedi Q.Kelimbetov Úkimet úiinde ótkent baspasóz máslixatynda.
Onyń aitýynsha, 2020 jylǵa deiingi jospar - «Astana» halyqaralyq qarjy ortalyǵynda 550-den astam kompaniiany tirkeý. Al osy ýaqytqa deiin tirkelgen kompaniialardyń ishinde AQSh, Qytai men Ulybritaniianyń ókilderi, sondai-aq, Qytaidyń úkimettik damý banki bar. Qarjylyq texnologiialar boiynsha tirkeýge turǵan kompaniialar da az emes. Olar - Resei, Tailand, Nigeriia, Afrika memleketteri men Shveitsariianyń ókilderi. Atalǵan kompaniialar jańa tólem quraldary, banking jáne taǵy basqa qyzmetter boiynsha jumys isteýge daiar.
Budan bólek, qarjy ortalyǵynyń birjasyna kelgen brokerlik kompaniialar da bar. Birjanyń basqarma tóraǵasynyń orynbasary Ámina Turǵylovanyń sózine qaraǵanda, osy aptada birqatar brokerlik kompaniialarǵa arnaiy kýálikter tapsyrylady.
