Qaýipsizdik Keńesiniń Apparatynda balalar men áielderdi otbasylyq-turmystyq jáne seksýaldyq zorlyq-zombylyqtan qorǵaý, sondai-aq sýitsidtik minez-qulyqtyń aldyn alý máseleleri boiynsha keńes ótkizildi, dep habarlaidy Aqordanyń baspasóz qyzmeti.
«Qazaqstan – 2050» Strategiiasynda Qazaqstan Respýblikasynyń Tuńǵysh Prezidenti – Elbasy Nursultan Nazarbaev ana men balany jan-jaqty qorǵaý qajettigin erekshe atap ótti.
Memleket basshysy Qasym-Jomart Toqaev óziniń 2020 jylǵy 1 qyrkúiektegi «Jańa jaǵdaidaǵy Qazaqstan: is-qimyl kezeńi» atty Qazaqstan halqyna Joldaýynda kámeletke tolmaǵandardyń qaýipsizdigi men quqyqtaryn qorǵaýdy, onyń ishinde balalardyń zorlyq-zombylyǵyna bailanysty tergelip jatqan árbir isti qatań baqylaýǵa alýdy qamtamasyz etý qajettigin atap ótti.
Talqylaýǵa Qazaqstandaǵy Bala quqyqtary jónindegi ýákil Arýjan Sain, «Nur Otan» partiiasy janyndaǵy Otbasy, áielder jáne balalardyń quqyqtaryn qorǵaý máseleleri jónindegi respýblikalyq qoǵamdyq keńestiń tóraiymy Dinara Zakieva, ýákiletti ortalyq jáne jergilikti atqarýshy organdardyń basshylary qatysty.
Keńeske qatysqan qoǵam belsendileri áielder men balalarǵa qatysty zorlyq-zombylyq máselesi qazaqstandyq qoǵamda áli de ózekti ekenin atap ótildi. Máselen, qylmystyq kórsetkishterdiń jalpy tómendeýine qaramastan, 2020 jyldyń 8 aiynyń nátijeleri boiynsha otbasylyq-turmystyq salada jasalǵan (598-den 656-ǵa deiin nemese 9,7% - ǵa) qylmystyq quqyq buzýshylyqtar kóbeigen.
Pikirtalas nátijeleri boiynsha osy saladaǵy jumysty jetildirý boiynsha usynystar ázirlendi. Atap aitqanda, qylmystyq isterdiń tiisti sanaty boiynsha quqyq qoldaný praktikasyna qadaǵalaýdy kúsheitýmen qatar, qoǵamda zorlyq-zombylyqqa tózbeýshilik mádenietin qalyptastyrýǵa, azamattardy balalardyń fizikalyq jáne rýhani qol suǵýyna jol bermeý rýhynda tárbieleýge nazar aýdarý usynyldy.
Osy turǵyda Prezidenttiń Kómekshisi- Qaýipsizdik Keńesiniń hatshysy Áset Isekeshev quqyqqa qarsy arandatatyn kontentti buǵattaý jóninde, onyń ishinde dástúrli otbasylyq qundylyqtarǵa mansuqtaityn, zorlyq-zombylyqty nasihattaityn, sondai-aq kámeletke tolmaǵandar arasyndaǵy sýitsidtikke itermeleitin árekettermen jumysty jandandyrýdy tapsyrdy.
Áset Isekeshev ortalyq memlekettik jáne aimaqtyq organ basshylaryn bólingen biýdjettik qarajatty tiimdi paidalanýdy tapsyrdy. Bir rettik shyǵyny kóp is-sharalardan góri, tiimdiligin dáleldegen naqty ispen ainalysatyn úkimettik emes uiymdarǵa basymdyq berýdi tapsyrdy.
Quqyq qorǵaý organdaryna Memleket basshysynyń tapsyrmalaryn iske asyrý boiynsha, onyń ishinde kámeletke tolmaǵandarǵa jynystyq zorlyq-zombylyq kórsetkenderdi jaýapkershilikke tartýdy qatańdatý boiynsha jáne qaralyp jatqan qylmystyq isterge kedergi jasap otyrǵandardy anyqtap, saraptama jasaýǵa tapsyrmalar berildi.
