Qazaqstan Prezidenti Qasym-Jomart Toqaev Qyrǵyzstan Prezidenti Sadyr Japarovpen jáne Tájikstan Prezidenti Emomali Rahmonmen telefon arqyly sóilesti, dep habarlaidy Aqordanyń baspasóz qyzmeti.
Memleket basshylary qyrǵyz-tájik shekarasynda bolǵan qarýly qaqtyǵystan keiingi qalyptasqan jaǵdaidy talqylady.
Qasym-Jomart Toqaev Sadyr Japarovqa jáne qyrǵyz halqyna baýyrlas el azamattarynyń qaza bolýyna bailanysty kóńil aitty. Qazaqstan Prezidenti mundai shekaralyq máselelerdi ózara túsinistik pen tatý kórshilik aiasynda tek qana beibit jolmen sheshý qajet ekenin atap ótti. Ol Dýshanbede ótetin joǵary deńgeidegi kelissózderge tabys tiledi. Sonymen qatar Memleket basshysy Sadyr Japarovpen tildesý barysynda qajet bolǵan jaǵdaida Qazaqstannyń Qyrǵyzstanǵa gýmanitarlyq kómek kórsetýge ázir ekenin aitty.
Sadyr Japarov baýyrlas Qazaqstannyń dostyq niet tanytqanyna rizashylyq bildirip, Prezident Qasym-Jomart Toqaevpen ózara yntymaqtastyqtyń barlyq máselelerin jedel sheshý úshin turaqty bailanysta bolatynyn jetkizdi.
Sondai-aq, Qazaqstan Prezidenti Qasym-Jomart Toqaev Tájikstan Prezidenti Emomali Rahmonmen telefon arqyly sóilesti.
Qazaqstan Prezidenti Qyrǵyzstan shekarasynda qalyptasqan shielenisti ahýalǵa bailanysty alańdaýshylyq bildirip, bul jaǵdai kórshi memleketter men olardyń azamattaryna qaýip tóndiretinin aitty.
Qasym-Jomart Toqaev shekara syzyǵyn belgileý siiaqty kúrdeli máseleler ózara senim men dostyqqa negizdele otyryp, konstrýktivti kelissózder barysynda sheshilýi kerek ekenin atap ótti. Memleket basshysynyń aitýynsha, mundai jaǵdaida ózara ustamdylyq tanytyp, kúsh qoldanýǵa jol bermeý asa mańyzdy.
Qasym-Jomart Toqaev aldaǵy ýaqytta osyndai qaqtyǵystardy boldyrmaý jóninde tiimdi kelisimge qol jetkizý úshin Dýshanbede joǵary deńgeide kezdesý ótkizý týraly ýaǵdalastyqty qoldady.
Emomali Rahmon Qasym-Jomart Toqaevqa shekaradaǵy qaqtyǵystyń tarihy men qazirgi qalyptasqan jaǵdai týraly tolyq aqparat berdi.
Memleketter basshylary Ortalyq Aziia óńirindegi ahýalǵa qatysty pikir almasý maqsatymen turaqty bailanysta bolýǵa ýaǵdalasty.
Eki eldiń quzyrly vedomstvolary joǵary deńgeidegi kezdesýge daiyndyq jumystaryn júrgizedi.
