Astanadaǵy Táýelsizdik saraiynda ótken Qazaqstan Prezidentin ulyqtaý rásiminde Qasym-Jomart Toqaev Qazaqstan halqyna ant berip, resmi túrde Memleket basshysy laýazymyna kiristi.
Eń aldymen, zalǵa Qazaqstan Respýblikasynyń Tuńǵysh Prezidenti Nursultan Nazarbaev kirdi. Jinalǵan qonaqtar Elbasyny dý qol shapalaqpen qarsy aldy. Osydan keiin "Elim meniń" áni shyrqalyp, zalǵa jańa sailanǵan prezident Qasym-Jomart Toqaev kirdi.
Sodan soń ulyqtaý rásimi ótetin saltanatty zalǵa Qazaqstan Respýblikasynyń Týy, shtandarty men Konstitýtsiiasy ákelindi.
Zańǵa sáikes Qasym-Jomart Toqaev Konstitýtsiiaǵa oń qolyn qoiyp: «Qazaqstan halqyna adal qyzmet etýge, Qazaqstan Respýblikasynyń Konstitýtsiiasy men zańdaryn qatań saqtaýǵa, azamattardyń quqyqtary men bostandyqtaryna kepildik berýge, Qazaqstan Respýblikasy Prezidentiniń ózime júktelgen mártebeli mindetin adal atqarýǵa saltanatty túrde ant etemin», - dep halyqqa ant berdi.
Sodan keiin memlekettik týdy súidi. Ant berilgen soń memlekettik ánuran oryndaldy. Ánuran oryndalyp jatqan ýaqytta syrttaǵy zeńbirekterden oq atyldy.
Sonymen qatar Ortalyq sailaý komissiiasynyń tóraǵasy Memleket basshysyna Qazaqstan Respýblikasy Prezidentiniń kýáligin tapsyrdy.
Eske sala keteiik, QR Ortalyq sailaý komissiiasynyń shyǵarǵan qorytyndysyna sáikes, 9 maýsymdaǵy kezekten tys prezidenttik sailaýda kandidat Qasym-Jomart Toqaev sailaýshylardyń 70,96 protsent daýysyn (sailaýshylardyń 6 539 715 daýysy) alyp, jeńiske jetken bolatyn. Osyǵan bailanysty Ortalyq sailaý komissiiasy QR Prezidentiniń ant berý kúnin 12 maýsymǵa belgileý týraly arnaiy qaýly qabyldaǵan edi.
