Kaspii teńiziniń sý deńgeii tómendep barady. Bul týraly QR Ekologiia, geologiia jáne tabiǵi resýrstar ministri Maǵzum Myrzaǵaliev «ECOJER» halyqaralyq kongresi barysynda aitty, dep habarlaidy QazAqparat.
«Kaspii teńizi de jeke nazar aýdarýdy talap etedi. 2006 jyldan bastap teńiz deńgeii tómendep kele jatyr. 2020 jylǵa qarai teńiz deńgeii 1 metrden astamǵa tómendep, Baltyq júiesi boiynsha minýs 28,23 metrge jetip qaldy. Kaspii teńiziniń tarihyna qaraǵanda, teńiz deńgeiiniń minýs 28,5 metr belgige tómendeýi onyń ekojúiesi úshin qaterli sanalady», - dedi ministr.
Onyń atap ótýinshe, bul jait Kaspii teńiziniń ásirese qazaqstandyq sektoryndaǵy jaǵalaý beldeýiniń ózgerýine alyp keldi.
«Osy aralyqta teńizdiń sý betiniń aýdany 22 myń sharshy shaqyrymnan astam qysqardy. Buǵan qosa, onyń jartysy Soltústik Kaspiidiń qazaqstandyq bóligine tiesili», - dedi Maǵzum Myrzaǵaliev.
