Aqtaý mańyndaǵy Kaspii teńizinde er adam sýǵa batyp kóz jumdy. Qaiǵyly oqiǵa Caspian Star demalys bazasynyń mańynda bolǵan, dep habarlaidy ult.kz.
Kýágerlerdiń aitýynsha, teńizde qatty tolqyn kezinde ákesi men balasy sýǵa bata bastaǵan. Jaǵalaýdaǵy demalýshylar dereý kómekke umtylyp, aldymen balany, keiin ákesin sýdan alyp shyqqan.
Lada.kz-tiń jazýynsha, er adam jaǵaǵa es-tússiz kúide jetkizildi. Oqiǵa ornyna jedel qyzmetter jetkenge deiin kýágerler oǵan uzaq ýaqyt boiy júrek-ókpe reanimatsiiasyn jasaǵan. Keiin qutqarýshylar men jedel járdemniń eki brigadasy kómek kórsetkenimen, onyń ómirin saqtap qalý múmkin bolmady.
Al qutqarylǵan jasóspirimge meditsinalyq kómek kórsetildi. Sondai-aq ony qutqarýǵa sýǵa túsken azamattardyń biri de dárigerlerdiń tekserýinen ótti.
Aldyn ala málimet boiynsha, qaiǵyly oqiǵa jaǵalaýdyń arnaiy jabdyqtalmaǵan bóliginde bolǵan. Kýágerlerdiń sózinshe, bul aýmaqta turaqty qutqarý beketi joq, al uialy bailanys nashar bolǵandyqtan jedel qyzmetterdi shaqyrý qiyndaǵan.
Qazirgi ýaqytta oqiǵanyń mán-jaiyn Mańǵystaý oblystyq Tótenshe jaǵdailar departamenti anyqtap jatyr. Qutqarýshylar turǵyndardy tek arnaiy jabdyqtalǵan jaǵajailarda shomylýǵa jáne teńizde qatty tolqyn kezinde sýǵa túspeýge shaqyrdy.
