Foto: Pexels.com
Almaty oblysy Qarasai aýdany Qaskeleń qalasyndaǵy Sátbaev atyndaǵy orta mektepte 9-synyp oqýshysy kóz jumdy, dep habarlaidy Ult.kz.
Qarasai aýdandyq bilim bóliminiń málimetinshe, qaiǵyly oqiǵa alǵashqy sabaqtan keiingi úzilis kezinde bolǵan. Tolyq málimet jariialanbaǵanymen, olardyń aitýynsha, 15 jastaǵy jasóspirimniń kenetten jaǵdaiy nasharlap, mektep ákimshiligi dereý jedel járdem shaqyrǵan.
"Jedel járdem brigadasy kórsetken reanimatsiialyq jáne meditsinalyq kómekke qaramastan, balany aman alyp qalý múmkin bolmady. Oqýshy oqiǵa ornynda qaitys boldy. Bul otbasy, jaqyndary jáne búkil mektep ujymy úshin aýyr qaiǵy", – dep habarlady Qarasai aýdanynyń bilim bólimi.
Sondai-aq bilim bóliminde quzyrly organdar tekserý jáne tergeý is-sharalaryn júrgizip jatqanyn aitty. Marqumnyń denesi sot-meditsinalyq saraptamaǵa jiberildi.
