Kásipodaqtar federatsiiasy kásipodaq uiymdaryna, jumyskerlerge jáne jumys berýshilerge koronavirýs infektsiiasyna qarsy vaktsinatsiia máselesi boiynsha úndeý joldady. "Ult aqparat" úndeýdiń tolyq mátinin jariialaidy.
Kásipodaqtar federatsiiasynyń kásipodaq uiymdaryna, jumyskerlerge jáne jumys berýshilerge koronavirýsqa qarsy vaktsinatsiia máselesi boiynsha ÚNDEÝI
Búkil álem, sonyń ishinde bizdiń elimiz de koronavirýs infektsiiasynyń kesirinen daǵdarysty bastan keshirip otyr.
Pandemiia eńbek naryǵyna keri yqpal etip, tolyq emes jumyspen qamtýdyń artýyna jáne ekonomikalyq belsendiliktiń tómendeýine, kásiporyndardyń jabylýyna, eńbek tabysynyń azaiýyna, eńbek qaýipsizdigi jáne eńbek quqyqtary salasynda jańa syn-tegeýrinderge alyp kelýde.
Osy jaǵdaida kásipodaqtar men jumys berýshilerdiń aldynda turǵan mańyzdy mindet – óndiristik áleýetti saqtap qalý.
Jumys oryndarynda virýstyń taralýyn toqtatý jáne jumyskerlerdiń qorǵalýyn qamtamasyz etý qajet.
Bul máselede el turǵyndaryn vaktsinatsiialaý mańyzdy qural bolyp tabylady. Vaktsinatsiia – bul pandemiiany toqtatýdyń, qaýipsiz eńbek jaǵdailaryn qamtamasyz etýdiń, jumysshylar men olardyń otbasylarynyń densaýlyǵyn qorǵaýdyń jalǵyz joly. Elde vaktsinatsiia alǵysy keletinderdiń barlyǵyna aqysyz vaktsinatsiia alýǵa jáne aýyr indettiń taralýyna jol bermeýge jaǵdai jasalǵan.
Biz jumyskerlerdi óz densaýlyǵy men jaqyndarynyń densaýlyǵyna qamqorlyq tanytyp, qaýipsiz jaǵdaida jumys isteý úshin COVID-19 qarsy vaktsina alýǵa shaqyramyz.
Kásipodaq aktivterin, kásipodaq múshelerin:
- ózińiz vaktsina alyp, ómirińiz ben densaýlyǵyńyzǵa jaýapkershilikpen qaraýdyń úlgisi bolýǵa;
- koronavirýstyń aldyn alý jáne qorǵaý sharalary boiynsha aqparattyq-túsindirý jumystaryn júrgizýge shaqyramyz.
Biz barlyq menshik formasyndaǵy uiymdardyń basshylaryn:
- COVID-19 taralýyna qarsy is-sharalardyń oryndalýyn baqylaýdy kúsheitýge;
- qyzmetkerlerdiń vaktsina alýyn uiymdastyrýǵa (meditsinalyq uiymda nemese kásiporyn aýmaǵynda);
- vaktsinatsiialanǵan jumysshylarǵa qosymsha áleýmettik kepildikterdi qarastyrýǵa (jalaqy saqtala otyryp, vaktsinatsiia kúninde demalys kúnin, demalysqa qosymsha aqyly kúndi, materialdyq tólemderdi jáne t.b. qarastyrý);
- vaktsinatsiiadan bas tartqan jumysshylarǵa tártiptik jaza qoldanbaýǵa shaqyramyz.
Birlesken kúsh-jiger men yntymaqtastyqty kórsetken jaǵdaida ǵana biz COVID-19-dy jeńip, qalypty ómirge qaita orala alamyz.
Sizdiń myqty densaýlyǵyńyz ben qaýipsiz eńbek jaǵdaiyńyz – bizdiń basty maqsatymyz!
Ózińizge jáne jaqyndaryńyzǵa qamqorlyq tanytyńyz!
Kásipodaqtar federatsiiasy
