Zardap shekken sektordaǵy shaǵyn jáne orta biznes úshin ainalymnan jekelegen salyq tóleý quqyǵy engiziledi. Bul týraly QR Premer-Ministriniń birinshi orynbasary Álihan Smaiylov aitty, dep habarlaidy QazAqparat.
«Salyq mindettemeleriniń oryndalýyn jeńildetý, salyqtar men tólemder sanyn azaitý maqsatynda ulttyq zańnamaǵa tolyq tekserý júrgiziledi. Bul jumys bastalyp ta ketti. Barynsha zardap shekken sektordaǵy shaǵyn jáne orta biznes úshin ainalymnan jekelegen salyq tóleý quqyǵy engiziledi. Ekonomikany ártaraptandyrý jáne iýdjetti tolyqtyrý úshin salyqtyq stavkany saralaý múmkindigi qarastyrylady», - dedi birinshi vitse-premer Úkimet úiindegi baspasóz máslihatynda.
Birinshi vitse-premer Úkimet jańa biýdjet saiasatyn ázirleýge jeke nazar aýdaratyndyǵyn aitty.
«Basty biýdjettik koeffitsientter men erejeler, tiimdilikti baǵalaý jáne biýdjet saiasatynyń turaqtylyǵy jinaǵy ázirlenetin bolady. «Keńeitilgen biýdjet» engizý arqyly shoǵyrlandyrylǵan biýdjetke biýdjetten tys qorlardy qosý jolymen memlekettik qarjyny keshendi baǵalaý engizý josparlanyp otyr. Nátijesinde biýdjettik josparlaýdyń jańa tásilderi memlekettik josparlaý júiesindegi ulttyq basymdyqtardy barynsha tolyq júzege asyrýdy qamtamasyz etedi», - dedi Álihan Smaiylov.
