17 adamnyń ómirin qiǵan Baizaq aýdanyndaǵy áskeri bólimdegi jarylys týraly jańa málimetter belgili boldy. Áskeri bólimde komandirdiń mindetin ýaqytsha atqarǵan azamat jarylysqa ákep soǵýy múmkin problemalar týraly aityp, kinálilerdi atady. Jábirlenýshiden aiyptalýshyǵa ainalǵan er adam barlyǵyn ashyq aitýdy jón sanapty, - dep habarlaidy Massaget.kz portaly KTK telearnasyna silteme jasap.
Arada bir jyl ótse de, oqiǵanyń mán-jaiy jumbaq kúide.
35 jastaǵy áskeri qyzmetshi Aslan Baqytjanov qaiǵyly oqiǵa kezinde bólimshe bastyǵynyń mindetin atqarýshy bolǵanyn, jumys barysynda órt sóndirý quraldary jumys istemeitinin, kadr tapshylyǵyn aityp basshylyqqa 8 ret shaǵym jazǵanyn málimdedi. Qurylǵylar jumys istemeitinin ministrlik te, áskeri prokýratýra da bilgen.
"Eger men jibergen ótinishterdiń barlyǵy der kezinde oryndalsa, mundai órt bolmas edi", - deidi Aslan Baqytjanov.
Áskeri qyzmetshiniń aitýynsha, qaiǵyly oqiǵa bolǵan kúni bólimshede órt habarlaǵyshtary jumys istemegen. Qoima terezelerinen shyqqan qoiý qara tútindi qaraýyldar ǵana baiqaǵan.
Endi Aslanǵa "jumysqa salǵyrttyq tanytty, oq-dárimen jumys isteý erejesin buzdy" degen aiyp taǵylyp otyr. Onymen birge bul iske taǵy bes adamnyń qatysy bar ekeni, onyń ekeýi ásker qataryna shaqyrylǵandar, olar qoimalardyń birine janyp jatqan shúberek laqtyrǵan degen boljam bar.
"Osy qoimany órtegender kináli. Bul qasaqana jasalǵan áreket. Oqiǵaǵa kýágerler, órtegen áskeri qyzmetshi óz kinásin moiyndap, qazir Tarazdaǵy tergeý izoliatorynda otyr", - deidi burynǵy áskeri.
