«Kiberqadaǵalaý» aqparattyq júiesiniń kómegimen qarjy piramidalaryn jarnamalaityn 52 silteme buǵattaldy. QR Bas prokýrory Ǵizat Nurdáýletov Májilis ókilderiniń depýtattyq saýalyna bergen jaýabynda osyndai derek keltirdi, dep habarlaidy QazAqparat.
«Jyl basynan beri Ishki ister ministrligine yqtimal qarjy piramidalary týraly 66 aqparat kelip tústi. Olardyń 9-y boiynsha sotqa deiingi tergeý bastaldy», - dep jazdy Ǵizat Nurdáýletov depýtattyq saýalǵa bergen jaýabynda.
Ol, sondai-aq, vedomstvonyń osy baǵytta júrgizip jatqan aldyn alý jumysy týraly málimet berdi.
«Internet jelisindegi zańsyz áreketterdiń jolyn kesý úshin Bas prokýratýranyń bastamasymen 2017 jyly «Kazdream Technology» JShS «Kiberqadaǵalaý» aqparattyq júiesin ázirledi», - dep jazylǵan Bas prokýrordyń jaýabynda.
Bas prokýratýranyń habarlaýynsha, júiege prokýratýra men aýmaqtyq vedomsvtoalarynyń, Ulttyq qaýipsizdik komiteti men aýmaqtyq departamentterdiń, ishki ister ministrligi men ákimdikterdiń 185 qyzmetkeri engizilgen.
«Aqparattyq júie fýnktsionaly quqyqqa qarsy kontentti qadaǵalaý men buǵattaidy. Sondai-aq, qaitalap jariialanǵan málimetterdiń qaralymyn zerdelep, statistika júrgizedi. Búgingi tańda júie qarjy piramidasynyń qyzmetin zańsyz jarnamalaityn 52 siltemeni buǵattady. Aqparat jáne qoǵamdyq damý ministrligi 9 internet-resýrsqa 39 jariialanymdy alyp tastaýdy talap etetin alty uiǵarym jiberdi» - dep túiindedi Ǵizat Nurdáýletov.
