Aqtóbedegi qarjy piramidasyn uiymdastyrýshylar 6 jyldan 12 jylǵa deiin bas bostandyǵynan aiyryldy, - dep habarlaidy Tengrinews.kz agenttigi Astanatv.kz arnasyna silteme jasap.
Aqtóbede qarjy piramidasyna qatysty atyshýly is boiynsha sot úkimi shyqty. Bul kásiporynnyń úsh uiymdastyrýshysy 6 jyldan 12 jylǵa deiin bas bostandyǵynan aiyryldy. Qarjy piramidasyna qatysty is bir jyldan astam tergeldi. Is boiynsha 10 myń azamat jábirlenýshi dep tanylǵan. Adamdar piramidaǵa kem degende 300 myń teńgeden salǵan jáne olarǵa eki ese kóp tabys ýáde etilgen.
Qarjy piramidasynyń negizin qalaýshylar 2020 jyldyń aqpanynda ustalǵan. Olardyń ekeýi Resei azamaty bolsa, bireýi - Aqtóbe qalasynyń turǵyny. Olardyń qyzmetinen kelgen shyǵynnyń jalpy somasy 10 milliard teńgeden asady.
"Sot úkimi boiynsha sottalýshylar qylmystyq quqyq buzýshylyq jasaǵany úshin kináli dep tanyldy. Litvinenko - 12 jylǵa, Moskvin - 9 jylǵa, Qazybaev 6 jylǵa bas bostandyǵynan aiyryldy. Sondai-aq, barlyq sottalýshyǵa 7 jyl merzimge kommertsiialyq jáne qarjy uiymdarynda basshylyq qyzmet atqarý quqyǵynan aiyrý túrindegi qosymsha jazaǵa kesildi. Jábirlenýshilerdiń azamattyq talaptary qanaǵattandyryldy", - dedi Aqtóbe oblystyq sotynyń baspasóz hatshysy Gúljanar Otarbaeva.
