QR Qarýly Kúshteriniń áskeri bólimderine dańqty qolbasshylardyń esimderi berildi, dep habarlaidy "Ult aqparat" ministrliktiń baspasóz qyzmetine silteme jasap.
Baspasóz qyzmetiniń málimetterine qaraǵanda, Qorǵanys ministriniń direktivasymen 37-shi desanttyq-shabýyldaý brigadasyna Keńes Odaǵynyń Batyry, general-maior Ivan Panfilovtyń esimi, 5-shi mehanikalandyrylǵan brigadaǵa Keńes Odaǵynyń Batyry, Halyq Qaharmany polkovnik Baýyrjan Momyshulynyń esimi berildi.
Bul áskeri bólimderge batyrlardyń esimderi kezdeisoq tańdalǵan joq. Almaty oblysynda 37-shi desanttyq-shabýyldaý brigadasy ornalasqan. Ol jerde 1941 jyldyń jazynda general-maior Ivan Panfilovtyń basshylyǵymen el aýzynda «Panfilovshylar» atymen belgili 316-shy atqyshtar diviziiasy quryldy.
5-shi mehanikalandyrylǵan brigada bolsa Taraz garnizonynda, bul Jambyl oblysy Jýaly aýdanynyń týmasy, ataqty qolbasshy Baýyrjan Momyshuly týǵan aimaqta ornalasqan.
Bundai igi bastamany áskeri bólimderdiń jeke quramy men Qorǵanys ministrliginiń basshylyǵy tutastai qoldaǵan bolatyn. Qorytyndy oń sheshimdi Úkimet janyndaǵy respýblikalyq onomastika komissiiasy shyǵardy.
«Áskeri bólimderge jaýynger qolbasshylardyń esimderin berý fashizmdi jeńýge, áskeri ǵylymdy, taktikany jáne shuǵyl urys ónerin damytýǵa eleýli úles qosqan aty ańyzǵa ainalǵan qolbasshylardy jadymyzda máńgi saqtaýǵa jáne jaýyngerlik dástúrdiń sabaqtastyǵyn jalǵastyrýǵa yqpal eteri sózsiz»,-delingen habarlamada.
