5 qarashada Qarýly Kúshter áskeri barlaýshylar kúnin atap ótedi. Áskeri barlaý qyzmetiniń qurylǵanyna 27 jyl tolýyna orai áskeri bólimderde sharalar ótkizilip, osy saladaǵy úzdikter anyqtaldy, dep habarlaidy "Ult aqparat" Qorǵanys ministrligine silteme jasap.
Áskeri barlaýshylardyń negizgi maqsaty – árekettegi nemese boljamdy qarsylas týraly, onyń áskeri resýrstary men jaýyngerlik múmkindikteri, álemdegi áskeri ahýal jaiyndaǵy málimetterdi alý jáne óńdeý boiynsha keshendi sharalardy oryndaý.
Áskeri barlaýshylar ulttyq múddeni qorǵap, elimizdiń qorǵanys qabiletin nyǵaitýǵa aitarlyqtai úles qosýda. Jyl saiyn olardyń jumys isteý ádisteri men tásilderi damyp jatyr, alaida negizgi maqsaty ózgergen joq.
Qazaqstan Qarýly Kúshteri arnaiy bólimshesiniń áskeri qyzmetshileri turaqty túrde halyqaralyq jarystar men oqý-jattyǵýlarǵa qatysý arqyly jaýyngerlik daǵdylaryn jetildirip, kásibiligin dáleldeýde. Sońǵy birneshe aida Qazaqstannyń arnaiy bólimsheleri «Altyn úki-2019» halyqaralyq jarysyna, «Ystyqkól-Ańyraqai-2019», «Dostarym-2109», «Túlki aýlaý-2019» syndy oqý-jattyǵýlarǵa qatysty.
Júktelgen mindetterdi atqarý úshin barlaýshylar telekommýnikatsiialyq, aqparattyq jáne ǵaryshtyq tehnologiialar salasyndaǵy sońǵy álemdik jetistikter negizinde qurylǵan zamanaýi tehnikalyq quraldarmen jabdyqtalǵan.
Barlyq ýaqytta áskeri barlaý memleket taǵdyrynda mańyzdy ról atqaryp, ulttyq múddelerdiń senimdi qorǵaýshysy boldy. Ol tarih betterinde beinesin ózgertse de, óziniń jaýyngerlik maqsatyn saqtap qaldy.
