Eńbek jáne halyqty áleýmettik qorǵaý ministri Birjan Nurymbetov Qarttar kúnine orai jasy júzge kelgen elorda turǵyny Aleksandr Torkindi úiine baryp, quttyqtap qaitty, dep habarlaidy QazAqparat tilshisi.
Qarttar kúnine orai ministr soǵys ardageriniń úiine baryp, jaǵdaiyn bildi. 1919 jyly ómir esigin ashqan Aleksandr Torkin soǵys jyldarynda Berlinge deiin fashisterdi shegindirgen maidanger. Maidannan oralǵannan keiin de el qatarly qyzmet etip, eki ǵasyrdyń – eki dáýirdiń kýágeri bolyp, 100 jasqa kelip otyr.
«Qarty bar úidiń qazynasy bar. Ómirimen bizge úlgi, urpaqqa durys baǵyt-baǵdar beretin de kónekózder. Ósip kele jatqan jas býynǵa patriotizmniń úlgisindei ortamyzda uzaq júre bersin deimiz. Memleket te, Elbasy men Prezident te árdaiym qarttardyń aldynda qaryzdar ári jaýapty ekenin sezinedi. Kárilerdi áleýmettik turǵyda qoldaý sharalary bizdiń elimizde jolǵa qoiylǵan. Búgingi tańda Qazaqstanda 2 mln 190 myń zeinetker bar. Zeinetaqy jyl saiyn ýaqtyly berilip, mólsheri ósip te keledi. Zeinetkerlerge arnaiy áleýmettik kómek kórsetetin respýblikada 700-ge tarta ortalyq bar», - dedi Birjan Nurymbetov ardagerdi quttyqtaý kezinde.
Aleksandr Torkinge ministr baǵaly syi – kárzeńke toly jemis-jidek, dámdi-tátti syilap, birshama áńgime órbitti.
Osydan keiin tilshilerge suhbat bergen ministrdiń aitýyna qaraǵanda, elimizde Aleksandar Torkin sekildi qarttarǵa úiinde baryp kómektesetin 488 ortalyq jumys istep tur.
«Búgin biz Aleksandr Petrovtyń úiinde boldyq. Onyń qasynda bizdiń jaýapty áleýmettik qyzmetshi tańnan keshke deiin kómektesedi. Jalpy, meniń oiymsha, Qazaqstan halqynyń eń bir artyqshylyqqa ie qasietteriniń biri – aǵa býynǵa degen qurmet. Kez kelgen kisiniń adami qundylyǵy, tárbiesi – aǵa býynǵa degen qarym-qatynasymen ólshenedi. Sol sebepti, dál osy Qarttar kúni aǵa býynǵa, ardagerlerge basymdy iip, alǵysymdy bildire otyryp, jastardy árdaiym qarttarǵa syi-qurmet kórsetýge shaqyramyn», - dedi ol.
