Qarqaraly memlekettik ulttyq tabiǵi parki Baqty orman sharýashylyǵyndaǵy shyqqan órttiń jalpy aýdany 2 500 gektarǵa jetti. Sonyń ishinde memlekettik orman qorynyń aýmaǵy 1 500 gektardy quraǵan, dep habarlaidy "Ult aqparat" QR Ekologiia, geologiia jáne tabiǵi resýrstar ministrligi Orman sharýashylyǵy jáne janýarlar álemi komitetine silteme jasap.
Komitettiń baspasóz qyzmetiniń málimetinshe, oqiǵa ornyna 120 adam (Qarqaraly MUTP-dan 39 adam, Qaraǵandy oblystyq TJD-dan 61 adam, Qaraǵandy oblystyq tabiǵi resýrstar jáne tabiǵat paidalanýdy retteý basqarmasynan 10 adam jáne t.b.), 16 órt sóndirý mashinasy, 3 traktor jáne 2 tikushaq, sý shashatyn qurylǵysy bar I synypty bir tikushaq (MI-8), MI-2 ekinshi tikushaǵy órt sóndirý qyzmetin áýeden baqylaýǵa tartyldy.
Qarqaraly aýdanynyń ákimdigi tótenshe jaǵdai rejimin jariialady.
Órt sóndirý qyzmeti órttiń taralýynyń aldyn alý jumystaryn júrgizip jatyr.
Eske salaiyq, 12 tamyzda saǵat 17:26-da órt sóndirý qyzmetine Qaraǵandy oblysy Qarqaraly aýdany Egindibulaq kentinen 30 shaqyrym qashyqtyqta, Qarqaraly memlekettik ulttyq tabiǵi parkiniń Baqty orman sharýashylyǵynyń aýmaǵynda qurǵaq shóp janyp, órttiń ormanǵa taralǵany týraly habar túsken.
