QR Memlekettik hatshysy Erlan Qarin Mańǵystaý oblysynda Ujymdyq qaýipsizdik týraly shart uiymynyń (ODKB) áskeri ornalasqan degen aqparatty joqqa shyǵardy, dep habarlaidy QazAqparat.
«Biylǵy 4-8 qańtar aralyǵynda Mańǵystaý oblysynda boldym. Onda ahýaldy turaqtandyrý jónindegi óńirlik shtabtyń jumysyn úilestirýge atsalystym. Aimaqtaǵy ahýal qazir turaqty. Memlekettik mekemeler men kommýnaldyq qyzmetterdiń barlyǵy qalypty rejimde jumys istep jatyr. Quqyq qorǵaý organdary jaǵdaidy tolyq baqylaýda ustap tur», - dedi Memlekettik hatshy Feisbýktegi paraqshasynda.
Odan bólek Erlan Qarin Mańǵystaý oblysynda tártipti tek Ulttyq ulannyń sarbazdary qadaǵalap turǵanyn aitty.
«Qoǵam belsendileriniń arqasynda bilik pen narazylyq bildirgen azamattardyń arasynda konstrýktivti dialog ornyqty. Osy óńirde Ujymdyq qaýipsizdik týraly shart uiymynyń (ODKB) áskeri ornalasqan degen qaýeset shyndyqqa janaspaidy. Oblystaǵy tótenshe jaǵdai rejimin qamtamasyz etýge óz elimizdiń qarýly kúshteriniń jáne Ulttyq ulannyń bólimsheleri ǵana jumyldyrylǵan», - dedi ol.
