© Sputnik / Vladislav Vodnev
Ulttyq qaýipsizdik komitetiniń burynǵy tóraǵasyna úkim shyqty. Ol 18 jylǵa bas bostandyǵynan aiyryldy, dep habarlady "Ult aqparat" Sputnik Qazaqstan saityna silteme jasap.
Astana qalasynyń qylmystyq ister jónindegi mamandandyrylǵan aýdanaralyq sotynda Kárim Másimovke (QR UQK burynǵy tóraǵasy), orynbasarlary bolǵan Sadyqulov, Erǵojin, Ósipovke qatysty qylmystyq is boiynsha úkim olardyń qatysýymen jariialandy. Sot isti "óte qupiia" degen belgimen qarady.
Tergeý aiyptaýy
Másimov pen Sadyqulov memleketke opasyzdyq jasady (QK 175-babynyń 1-bóligi), bilikti kúshpen basyp alýǵa oqtaldy (QK 179-babynyń 3-bóligi) jáne bilik pen laýazymdyq ókilettikti asyra paidalandy (QK 362-babynyń 4-bóligi 3-tarmaǵy) dep aiyptaldy.
Erǵojinge bilikti kúshpen basyp almaq boldy (QK 179-babynyń 3-bóligi) jáne bilik pen laýazymdyq ókilettikti asyra paidalandy degen (QK 362-babynyń 4-bóligi 3-tarmaǵy), al Ósipovke bilik pen laýazymdyq ókilettikti asyra paidalandy degen aiyp taǵyldy (QK 362-babynyń 3-bóligi).
Sot sheshimi
Kárim Másimov Qylmystyq kodekstiń 175-babynyń 1-bóligi, 179-babynyń 3-bóligi, 362-babynyń 4-bóligi 3-tarmaǵy boiynsha kináli dep tanyldy. Jazany ishinara qosý arqyly 18 jylǵa bas bostandyǵynan aiyrý, múlki tárkilenip, ómir boiy memlekettik qyzmette qyzmet atqarý quqyǵynan aiyrý jazasy taǵaiyndaldy.
Sadyqulov Qylmystyq kodekstiń 175-babynyń 1-bóligi, 179-babynyń 3-bóligi, 362-babynyń 4-bóligi 3-tarmaǵy boiynsha kináli dep tanyldy. Jazany ishinara qosý arqyly 16 jylǵa bas bostandyǵynan aiyrý jazasy taǵaiyndaldy, ómir boiy memlekettik qyzmette qyzmet etý quqyǵynan aiyryldy.
Erǵojin Qylmystyq kodekstiń 179-babynyń 3-bóligi, 362-babynyń 4-bóligi 3-tarmaǵy boiynsha kináli dep tanyldy. Jazany ishinara qosý arqyly 15 jylǵa bas bostandyǵynan aiyrý jazasy taǵaiyndaldy. Ómir boiyna memlekettik qyzmette qyzmet etý quqyǵynan aiyryldy.
Ósipov Qylmystyq kodekstiń 362-babynyń 3-bóligi boiynsha kináli dep tanyldy jáne oǵan memlekettik qyzmette qyzmet atqarý quqyǵynan aiyra otyryp, 3 jylǵa bas bostandyǵynan aiyrý jazasy taǵaiyndaldy.
K.Másimov, A.Sadyqulov, D.Erǵojin jáne M.Ósipov general ataqtarynan jáne memlekettik nagradalardan aiyryldy.
Memleket kirisine 10 milliard teńge jáne 24 million AQSh dollarynan astam qarjy óndirildi. Úkim zańdy kúshine engen joq.
