2021 jyldyń 4 toqsanynda kardiohirýrgiia boiynsha qyzmetterge jańa tarif engiziledi. Bul jaiynda senatorlardyń depýtattyq saýalyna QR Premer-Ministri Asqar Maminniń jaýabynda aitylǵan, dep habarlaidy QazAqparat.
«Tegin meditsinalyq kómektiń kepildik berilgen kólemi sheńberinde jáne mindetti áleýmettik meditsinalyq saqtandyrý júiesinde kardiohirýrgiia boiynsha tarifterdi qaita qaraý boiynsha usynystar ázirlendi. 2021 jylǵa arnalǵan meditsinalyq qyzmetterge tarifterdi qalyptastyrý jónindegi jumys josparyna sáikes ázirlengen tarifterdi pilottyq testileý kózdelgen. Aǵymdaǵy jyldyń 4-toqsanynda kardiohirýrgiia boiynsha qyzmetterge jańa tarifter engiziledi», - dedi Asqar Mamin.
Onyń atap ótýinshe, «Respýblikalyq jáne oblystyq biýdjetter, respýblikalyq mańyzy bar qalalar, astana biýdjetteri arasyndaǵy 2020-2022 jyldarǵa arnalǵan jalpy sipattaǵy transfertterdiń kólemi týraly» Qazaqstan Respýblikasynyń Zańy aiasynda densaýlyq saqtaý uiymdarynyń kúrdeli shyǵyndaryna jalpy somasy 105 mlrd teńge qarastyrylǵan.
«Qazirgi ýaqytta Dúniejúzilik banktyń qaryzy aiasynda meditsinalyq uiymdardy, onyń ishinde kardiohirýrgiialyq uiymdardy, meditsinalyq jabdyqtarmen qamtamasyz etý pysyqtalýda. 2020 jylǵy 8 jeltoqsanda Densaýlyq saqtaý ministrliginde «Universal Medical Center» korporativtik qorynyń (budan ári – «UMC» KQ) Basqarma tóraǵasy Iu.Pianyń qatysýymen balalar kardiohirýrgiiasyn damytý taqyrybynda kezdesý ótkizildi. «UMC» KQ aýmaǵynda balalar hirýrgiialyq ortalyǵyn salý máselesi pysyqtalýda», - dedi Úkimet basshysy.
