Qazaqstannyń shyǵys, ońtústik-shyǵys, ońtústik jáne batys óńirlerinde «Qarataý-2017» jedel-strategiialyq oqý-jattyǵýy jalǵasýda. Oǵan 10 myńǵa jýyq áskeri qyzmetshi, bir jarym myńnan asa jaýyngerlik tehnika, 40-tan asa ushaq pen tikushaq, sondai-aq Áskeri-teńiz kúshteriniń korablderi tartyldy.
Áskerler qolbasshylarynyń qaita toptastyrýǵa qabyldaǵan sheshimderine sáikes áskerler shartty daǵdarys aýdandaryna birneshe júzdegen shaqyrymǵa marsh jasaýda. Daǵdarys aýdandaryna irgeles ornalasqan aýmaqta áskerlerdiń is-qimyldaryn qamtamasyz etý úshin bir ýaqytta 200-den asa adamdy quraityn taktikalyq áýe desanty túsirildi. Sátti túsirýden keiin desanttyq-shabýyldaý batalony biik jerge ornalasyp, ári qarai motoatqysh jáne tankti bólimshelerdiń óristetilýi úshin jerdiń baqylaýyn júzege asyrady.
Oqý-jattyǵýǵa aviatsiia belsendi túrde tartylǵanyn aita ketý qajet. Birinshi kezeńde S-295 áskeri-kólik aviatsiiasynyń ushaqtary jeke quramdy jedel almastyrýdy oryndaidy. Armiialyq aviatsiia tikushaqtary taktikalyq áýe desantyn túsirýdi ótkizedi, qozǵalý baǵdarlaryn barlaýdy júrgizedi, sondai-aq olardy áýeden tasalai otyryp, jaýyngerlik tehnikanyń lekterin alyp júredi. Oqý-jattyǵý bastalysymen áskerlerdi basqarý dalalyq basqarý pýnktterinen júrgizilýde. Búgingi basqarý pýnktteri barlyq qajetti bailanys túrlerimen jabdyqtalǵan, búrkemeleý men qorǵalýdyń jetkilikti deńgeiine ie. Bul uzaq ýaqyt boiy avtonomdyq jumysty júrgizýge múmkindik beredi.
"Oqý-jattyǵý barysynda qolbasshylar men komandirlerdiń qalyptasqan jaǵdaidy jyldam baǵalap, anaǵurlym maqsatqa sai sheshim qabyldaý sheberlikterine erekshe kóńil bólinedi. Sheshim qabyldaý kezindegi jedeldilik baǵynysty áskerlerge jaýyngerlik is-qimyldarǵa is júzindegi daiyndyqty, al sheshim qabyldaýdyń maqsatqa sáikestiginen túpki nátijede operatsiianyń sátti ótýi bailanysty", - dep Bas shtaby bastyǵynyń birinshi orynbasary general-maior Rýslan Shpekbaev túsinikteme jasady.
