ShQO bas memlekettik sanitar dárigeri mindetin atqarýshynyń jańa qaýlysy jariialandy, dep habarlaidy "Ult aqparat".
Qaýlyda jazylǵandai, meshitterde namaz (onyń ishinde juma namazyn) kelýshilerdi shahmattyq rettilikpen otyrǵyzyp, jalpy syiymdylyǵynyń 30%-na deiin toltyrýmen oqýǵa ruqsat berildi.
1-5 synyptar jáne 9, 11 (12) synyptar aptanyń 6 kúninde aralas oqidy. Pánderdiń 70%-y shtattyq rejimde, 30%-y qashyqtan oqytý formatynda júzege asyrylady.
«Sondai-aq toltyrylýyn 30%-dan asyrmai, jalpy sany 50 adamǵa eske alý rásimderin (as berý) ótkizýge, bir otbasy múshelerin qospaǵanda kórermenderdi shahmattyq rettilikpen otyrǵyzyp, jalpy adam sanyn 20%-dan asyrmai sporttyq is-sharalardy ótkizýge bolady. Balalardyń oiyn alańdaryn, attraktsiondardyń toltyrylýyn 30%-dan asyrmai, jalpy sany 50 balany kirgizip jumys isteýge ruqsat etildi» delingen qujatta.
Endi tsirkke de barýǵa bolady. Qoiylar talap – kelýshilerdi shahmattyq rettilikpen otyrǵyzyp, jalpy adam sanyn 30%-dan artyq toltyrmaý.
«Jalpy adam sanyn 30%-dan asyrmai biliard klýbtary jumys istei bastaidy. Jeke nemese 15 adamnan aspaityn toptar úshin maskalyq rejimdi jáne keminde 2 metr qashyqtyqty saqtai otyryp, erekshe qorǵalatyn tabiǵi aýmaqtarǵa barýǵa ruqsat berildi. Ulttyq qurama, klýbtyq komandalar jáne oblystyq komandalardy daiyndaý úshin bir mezgilde 30 adamnan aspaityn mólsherde oqý-jattyǵý jiyndaryn ótkizýge bolady. Biraq kezekshi toptardy qospaǵanda, mektepke deiingi mekemelerge jáne balalar saýyqtyrý lagerleriniń qyzmetine tyiym salynǵan» delingen qaýlyda.
