Politsiia, ákimdik jáne taýarlar men qyzmetterdiń sapasy men qaýipsizdigin baqylaý basqarmasy ókilderinen turatyn mobildi toptar karantin rejiminiń buzylýyn anyqtaýdy jalǵastyrýda, dep habarlaidy "Ult aqparat".
Nur-Sultan qalasy politsiia departamentiniń baspasóz qyzmeti monitoringtik top ókilderiniń jaqynda tekserý jumystary barysynda «Jumbaqtas» meiramhanasynda ótip jatqan tusaýkeser toiynyń ústinen túskenin málim etti. Meiramhanada 70 adam bolǵan, olardyń arasynda qart adamdar men jas balalar da bar.
«Kópshilik arasynda birneshe saǵat bolǵan azamattar ózderiniń densaýlyǵyna ǵana emes, ainalasyndaǵylardyń ómiri men densaýlyǵyna qaýip tóndirip turǵanyn túsinbeidi»,-deidi politsiia.
Sondai-aq Qabanbai batyr kóshesindegi «VaoVao» meiramhanasyna jasalǵan reid kezinde saǵat 23.10-da karantin talaptaryna qaramastan 100-ge jýyq kelýshi bi alańynda mýzakany shyńǵyrtyp qoiyp, bi bilep, áleýmettik qashyqtyqty umytqan. Qalǵandary ústel basynda otyrǵan.
Menshik ielerine qatysty jinalǵan material ÁQBtK-niń 425-baby boiynsha ákimshilik is qozǵaý úshin ýákiletti organǵa jiberildi.
Jalpy, aǵymdaǵy jyldyń basynan beri karantin kezeńinde mobildi toptar 894 reid júrgizip, 544 zań buzýshylyq anyqtaldy.
Nur-Sultan qalalyq politsiia depapratmenti kásipkerlerge karantin sharalaryn buzǵany úshin jáne qyzmettiń toqtatylýy úshin jaýapkershilik qarastyrylǵany týraly eskertedi jáne sanitarlyq normalardy saqtaýǵa shaqyrady.
