Qazaqstanda karantin talaptaryn saqtai otyryp BAQ ókilderin is-sharalarǵa tikelei qatysýǵa ruqsat berý máselesi qaralyp jatyr, dep habarlaidy QazAqparat.
«Aldymen Nur-Sultan qalasynyń áli de bolsa «qyzyl» aimaqta ekenin umytpaǵan jón. Al toi-toimalaq jasaýǵa berilgen ruqsatqa kelsek, shaǵyn jáne orta biznes ókilderi tarapynan kóptegen ótinishter kelip tústi. BAQ ókilderin memlekettik organdarda ótip jatqan sharalarǵa tikelei kirgizbeý aqparat alýda shekteý qoiý deýge bolmaidy. Bizde BAQ-tyń jumysyna kedergi keltirip, shek qoiý degen másele joq. Parlament, Úkimet úiinde ótip jatqan barlyq is-sharalar jurtshylyqqa onlain taratylady»,- dedi QR Premer-Ministrdiń orynbasary Eraly Toǵjanov Úkimet úiinde onlain ótken baspasóz máslihatynda.
Sondai-aq, Premer-Ministr orynbasary elimizde karantin talaptary bar ekenin taǵy bir eske salyp, maska taǵý jáne áleýmettik araqashyqtyqty saqtaýǵa shaqyrdy.
«Tilshilerdiń aqparat alýyna qatysty shekteýler joq. Qajet jaǵdaida tiisti organǵa resmi saýal joldai alady, odan bólek, kúndelikti onlain baspasóz máslihaty uiymdastyrylyp jatyr. Onyń barysynda BAQ ókilderi óz saýaldaryn quzyrly organ ókilderine tikelei qoia alady. Búgindi tańda sanitarlyq talaptardy saqtai otyryp, tilshilerdiń tikelei qatysýymen baspasóz máslihatyn ótkizý máselesi qaralyp jatyr», - deidi ol.
Sol siiaqty Eraly Toǵjanov aldaǵy ýaqytta tilshilerdiń qatysýymen ótetin is-sharalarǵa Ashyq júiesimen kirgiziletinin eskertti.
Qazaqstandaǵy resmi sharalar jýrnalisterdiń qatysýynsyz 2020 jyldyń naýryzynan bastap ótkizilip keledi. Shekteýler osy kúnge deiin jalǵasqan.
