Qaraqalpaqstannyń Nókis qalasyndaǵy prezident mektebiniń 11 synyp oqýshysy Aryslan Qalbaev AQSh ýniversitetteriniń jiyny 297 myń dollar granttaryn jeńip aldy, dep habarlaidy QazAqparat.
Qaraqalpaqstannyń Nókis qalasynda prezident mektebi Ózbekstan Prezidenti Shavkat Mirzieevtiń bastamasymen 2019 jyl 11 jeltoqsanda ashylǵan. Sol ýaqyttan beri mektepte daryndy balalar oqyp jatyr.
Taiaýda atalmysh mekteptiń 11 synyp oqýshysy Aryslan Qalbaev Dreksel ýniversitetiniń - 169 200, Halt halyqaralyq biznes mektebiniń - 40 000, Maiami ýniversitetiniń – 88 000, jalpy somasy 297 000 dollar grantyn jeńip aldy.
Aryslan Qalbaev 2004 jyl 9 tamyzda Nókis qalasynda dúniege kelgen. Ata-anasy kórkemóner salasynda eńbek etedi. Ákesi Bazarbai Erniiazov Nókis qalasyndaǵy mamandandyrylǵan mádeniet mektebiniń halyq áýenderi kafedrasynda Qashqar rýbab-primadan, anasy Tamara Tájimuratova da osy mektepte hor jáne solfedjiodan sabaq beredi.
A. Qalbaev aǵylshyn tiline qyzyǵady. Mektepte pán olimpiadalaryna qatysyp, 2017 jyl qalalyq, 2018 jyl respýblikalyq olimpiada jeńimpazy bolǵan.
9-synypqa deiin Nókis qalasyndaǵy №37 arnaýly mektepte oqyǵan. Synyp jetekshisi Mýhabbat Tileýova, aǵylshyn tili pániniń muǵalimderi Qarlyǵash Álieva men Gúlnara Erejepova A. Qalbaevqa bilim jolynda durys baǵyt-baǵdar berip, shyńdalýyna septigin tigizdi. Ol 2019 jyl Nókis qalasyndaǵy prezident mektebine qabyldandy. Bul oqý ornynda izdenisterin tereńirek jalǵastyrýǵa múmkindiktiń moldyǵyn bilgen soń, 10-synyptyń ózinde-aq IELTS emtihanyn tapsyryp, S- 1 dárejesin aldy.
«Aryslanbek úlgili oqýshylarymnyń biri. Bolashaǵy jarqyn bolýyna tilektespin. Basqa oqýshylarǵa jolyn bersin!» , - deidi mekteptiń qaraqalpaq tili jáne ádebieti muǵalimi, filologiia boiynsha filosofiia doktory (PhD) Gúlbahar Begmuratova.
297 000 dollar granttardy jeńip alǵan A. Qalbaev AQSh ýniversitetinde ekonomikalyq bilim alyp, halyqaralyq biznesti damytýdy armandaidy.
