Qaraǵandy qalasynda kópqabatty úilerdiń birinen órt shyǵyp, mamandar 19 adamdy qutqaryp, evakýatsiialady. Ysty gazǵa ýlanǵan qart áiel jedel járdem kóliginde qaitys boldy, dep habarlaidy "Ult aqparat".
Qaraǵandy qalasy Kúzembaev kóshesindegi 5 qabatty turǵyn úide órt shyqqany týraly habarlama 10 naýryz, saǵat 03:26-da túsken.
Shaqyrý ornyna jetken órt sóndirý bólimsheleri kireberistegi qatty tútindi baiqaǵan. Gaz-tútinnen qorǵaý qyzmetiniń eki toby barlaýǵa, podezd turǵyndaryn qutqarýǵa jáne evakýatsiialaýǵa baǵyttaldy.
«Qatty tútinniń saldarynan 4-shi qabatta ornalasqan páterden óz betinshe evakýatsiialanýǵa tyrysqan anasy men balasy tabyldy. 1946 jyly týǵan áiel ýly gazdan ýlanyp, jedel járdem kóliginde kóz jumdy», - dep málim etti Qaraǵandy oblystyq Tótenshe jaǵdailar departamentiniń baspasóz qyzmetinen.
Órt sóndirýshi-qutqarýshylar avtosatynyń kómegimen osy kireberistiń páterlerinen 4 adam, onyń ishinde 3 balany qutqardy. Sondai-aq, baspaldaq marshy boiynsha 15 adam, onyń ishinde 4 bala evakýatsiialandy.
Besinshi qabattaǵy páterden eki adam aýrýhanaǵa jatqyzyldy – ana men bala iis tiip ýlanǵan.
Jalyn 1-shi qabattaǵy baspaldaqtyń astynda ornalasqan aǵash qoimadan shyqqan. Órt sóndirýshiler janyp jatqan qoimadan syiymdylyǵy 27 litr bos gaz ballonyn alyp shyqty. Órttiń jalpy aýdany 3 sharshy metrdi qurady.
Órt bolǵan jerge Qaraǵandy oblysy TJD-niń 12 adamy men 3 tehnikasy jumyldyryldy. Qabyldanǵan sharalarmen órt saǵat 03:49-da sóndirildi.
Aldyn ala boljam boiynsha órttiń sebebi ashyq ot kózi boldy.
TJD mamandary órt shyqqan kezde ustanatyn erejelerdi eske salady:
- Órttiń alǵashqy belgilerinde birden 101 nemese 112 nómirine qońyraý shalý qajet. Eshbir jaǵdaida dúrbeleńge boi aldyrmańyz!
- Qatty tútindi keńistikte eńbektep nemese eńkeiip qozǵalý kerek. Sebebi tómende tútin az bolady. Muryn men aýyzdy dymqyl shúberekpen, súlgimen jáne ózge zatpen jabý kerek.
- Eger shyǵý joly ot nemese tútinmen jabyq bolsa jáne baspaldaq marshymen júgirýge múmkindik bolmasa, balkonǵa shyǵyp, balkon esigin myqtap jaýyp nemese tereze aldynda turý kerek.
- Esińizde bolsyn! Órt kezinde liftini paidalanýǵa tyiym salynady.
Sondai-aq qutqarýshylar azamattardan óz qaýipsizdigi máselesine muqiiat, baiypty qaraýdy jáne turmysta órt qaýipsizdigi erejelerin saqtaýdy suraidy:
- sóndirilmegen temekilerdi, sirińkelerdi, shyraqtardy jáne basqa da ot kózderin qaldyrmańyz;
- elektr symdary men aspaptarynyń jaramdylyǵyn qadaǵalańyz;
- elektr jelilerin shamadan tys júktemeńiz;
- tek jaramdy pesh, gaz, elektr jabdyqtaryn paidalaný qajet.
