QR Aqparat jáne qoǵamdyq damý ministri Dáýren Abaev tótenshe jaǵdai kezinde adamdardyń karantin aýmaǵyna kirip ketý jaǵdaiy týraly aityp berdi, dep habarlaidy "Ult aqparat".
«Tótenshe jaǵdai kezinde adamdar karantin aýmaǵyna kirip ketýge tyrysyp jatyr. Sońǵy táýlikte tótenshe jaǵdai rejimin buzǵany úshin Ákimshilik quqyqbuzýshylyq kodeksiniń 476-baby boiynsha 137 adam jaýapqa tartyldy, 89-y qamaldy. Olardyń bári de óz áreketteriniń zańǵa qaishy ekenin moiyndady», - dedi ministr «Habar 24» arnasyndaǵy onlain rejimdegi baspasóz máslihatynda.
Dáýren Abaev kei jaǵdaida tipti aqylǵa syimaityn jaǵdailar tirkelip jatqanyn aitady.
«Qaraǵandyda óziniń burynǵy áieliniń palatasyna tereze arqyly kirmek bolǵan er adam 10 táýlikke qamaldy. Áieli karantinde jatqan. Ol Germaniiadan kelgen. «Nelikten?» degen suraq týyndaidy» - deidi ol.
