Qaraǵandy qalasynda 4 qarashada jańa jyl túni "Drevnii Rim" meiramhanasyndaǵy tóbeles boiynsha sot úkimi shyqty. Osy tóbeleste 23 jastaǵy jergilikti turǵyn Rahymjan Janseiit qaza bolǵan edi.
Aiyptalýshy 23 jastaǵy Iýsif Nýrýlýdy sot kináli dep tanyp, 19 jylǵa bostandyǵynan aiyrdy. Úkim shyqqan kezde densaýlyǵy nasharlaǵan Nýrýlýdyń anasyn dálizge áketti. Ol ulynyń kinásizdigin aiǵailap aitty.
Qylmystyq is boiynsha barlyǵy 13 adam sottaldy. "Buzaqylyq jasady" dep aiyptalǵan 12 adamnyń tórteýiniń árqaisysyn 3 jylǵa bas bostandyǵynan aiyrdy. Alty aiyptalýshynyń bostandyqtary tórt jarym jyldan shekteldi. Jábirlenýshi tarappen bitimge kelgen eki adam qylmystyq jaýapkershilikten bosatyldy. Sottalǵan tórt adam, úsheýi Armeniia, bireýi Ózbekstan azamaty jazasyn ótegennen keiin Qazaqstan aýmaǵynan shyǵarylatyn boldy jáne ári qarai bes jyl boiyna Qazaqstanǵa kelýge tyiym salyndy.
Tergeý men sot potsesi kezinde kepilmen bostandyqta júrgen aiyptalýshy Sh. Iliany sot zalynan qamaýǵa alý týraly sheshim shyǵardy. Úkim sátine qatyspaǵan Sh. Iliaǵa jeke qaýly shyǵarylady.
Buǵan deiingi jaryssóz kezinde prokýror 23 jastaǵy Rahymjan Janseiitti óltirdi dep aiyptalǵan Iýsif Nýrýlýny 20 jylǵa bas bostandyǵynan aiyryp, airyqsha tártiptegi túzetý koloniiasyna jiberýdi, qalǵan 12 aiyptalýshyny alty jylǵa bas bostandyqtarynan aiyryp, jalpy rejimdegi túzetý koloniiasyna jiberýdi suraǵan bolatyn.
Aiyptalýshylardyń keibiri taǵylǵan aiypty ishinara, keibiri tolyq moiyndaǵan. Oqiǵa kezinde qaza bolǵan Rahymjan Janseiittiń ákesi 30 million teńge moraldyq ótemaqy alǵanyn aitqan.
«Drevnii Rim» meiramhanasyndaǵy tóbeles pen kisi ólimi jaily sot protsesi qyrkúiek aiynda bastalǵan. Rahymjan Janseiittiń denesi 1 qańtarda, meiramhanadaǵy tóbelesten keiin birneshe saǵattan soń tabylǵan. Aiyptaý aktisinde onyń qan ketip qaitys bolǵany kórsetilgen. Buryn tergeý barysynda Rahymjan Jaiseiitti birneshe adam jabylyp uryp, pyshaqtaǵany aitylǵan. Tóbeles kezinde barlyǵy bes adam pyshaqtalǵan.
Aiyptaý málimetine qaraǵanda, tóbeles kezinde eki aiyptalýshy pyshaq qoldanǵan. Iýsýf Nýrýly úsh adamdy, G. Narek eki adamdy pyshaqtaǵan. G.Narekke osy oqiǵadan keiin izdeý jariialanyp, Reseide ustalǵan. Áli Qazaqstanǵa ekstraditsiialanbaǵan G.Narektiń isi bólek qaralady.
"Drevnii Rim" meiramhanasyndaǵy jappai tóbeles pen kisi ólimi Qazaqstan qoǵamy men keibir shetelde túrli reaktsiia týdyrǵan. Áleýmettik jelilerde "tóbeleske armian diasporasynyń ókilderi qatysty" degen aqparattar taraǵan. Qazaqstan biligi men Armian biligi muny "turmystyq janjal" dep atap, "ult aralyq qatynas" dep sipattamaýǵa shaqyrǵan.
