Qaraǵandyda birneshe ret jas balany zorlaý faktisi boiynsha ustalǵan meshit moldasyna qatysty úkim jariialandy, dep habarlaidy "Ult aqparat".
Búgin Qaraǵandy oblysynyń qylmystyq ister jónindegi mamandandyrylǵan aýdanaralyq sotymen jas qyz balaǵa qatysty kúsh qoldanyp, onyń dármensiz kúiin paidalanyp birneshe ret zorlaý faktisi boiynsha QK-tiń 120-b. 4-b sai úkim jariialandy.
Sottalýshynyń kinási jábirlenýshiniń, onyń zańdy ókiliniń, kýálardyń aiǵaqtarymen, saraptama qorytyndysy jáne basqa materialdarmen dáleldendi.
Esterińizge sala keteiik, 2020 jyldyń qańtar aiynda aýyl meshitiniń moldasy qyzmetin atqaryp júrip, sol aýyldyń bir otbasyna úi men mal sharýashylyǵyna kómektesip júrgen.
Bir kúni úide úlkenderdiń joqtyǵyn paidalanyp, din qyzmetkeri sol úidiń 14 jasar qyz balasyn zorlaǵan.
Sońyra anyqtalǵandai, ondai áreketterdi molda birneshe ret qaitalaǵan. Saldarynan qyz bala júkti bolyp qalǵan.
Prokýror sottalǵandy Qylmystyq kodekstiń 120-b. 4-b. boiynsha kináli dep tanyp 20 jylǵa bas bostandyǵynan aiyrý jazasyn taǵaiyndaýdy surady.
Jábirlenýshiniń zańdy ókili prokýrormen kelisti. Alaida qorǵaýshy tarap sottalǵan kinásin jartylai moiyndaǵandyqtan, ony katań jazalamaýdy surady.
Nátijesinde, sottyń úkimimen aiyptalýshy jas balany, onyń dármensiz kúiin paidalanyp birneshe ret zorlaǵany úshin kináli dep tanylyp (QK 120-b. 4-b.), oǵan pedagogikalyq laýazymdardy jáne kámeletke tolmaǵandarmen jumys isteýge bailanysty laýazymdardy atqarýǵa ómir boiyna tyiym sala otyryp, 20 jylǵa bas bostandyǵynan aiyrý jáne jazany óteý qylmystyq-atqarý júiesiniń qaýipsizdigi barynsha joǵary mekemesinde taǵaiyndaldy.
«Is boiynsha qylmystyq jaýapkershilik pen jazany jeńildetetin jáne aýyrlatatyn mán-jai anyqtalmaǵan. Qylmystyq zańda osyndai qylmys úshin 20 jylǵa bas bostandyǵynan aiyrý jazasy qarastyrylǵan. Jazany taǵaiyndaý kezinde sottalǵannyń bala kezinen úshinshi toptaǵy múgedek ekeni, buryn sotty bolmaǵany jáne kinásin jartylai moiyndaǵany, sonymen qatar jábirlenýshiniń pikiri eskerildi», - dep málimdedi Qaraǵandy oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmeti.
