Zań ǵylymdarynyń doktory, professor Nurlan Dýlatbekov E. A. Bóketov atyndaǵy Qaraǵandy ýniversitetine rektor bolyp taǵaiyndaldy, dp habarlaidy "Ult aqparat" óńir basshysynyń resmi saityna silteme jasap.
QR BǴM ministri Ashat Aimaǵambetov QarÝ professorlyq-oqytýshylyq quramyna jańa rektordy tanystyrdy.
«Respýblikalyq baiqaý komissiiasynyń sheshimimen jáne meniń ókimimen Qaraǵandy ýniversitetiniń jańa rektory bolyp Nurlan Dýlatbekov taǵaiyndaldy. Nurlan Orynbasaruly Prezidenttiń bilim berý salasynda qoiǵan mindetterin oryndaý úshin barlyq múmkindikti jasaidy. Men eń aldymen JOO-n taldap, jańa strategiiany bekitý kerek dep sanaimyn. Ekinshiden, kadrlyq qamtamasyz etýge kóńil bólip, nyǵaitý kerek. Úshinshi másele – pedagogtardyń jalaqylaryn kóterý», - dep atap ótken Ashat Aimaǵambetov jumystaǵy basymdyqtardy belgiledi.
Qaraǵandy oblysynyń ákimi Jeńis Qasymbek Nurlan Dýlatbekovty taǵaiyndalýymen quttyqtady.
«Sailaý nátijeleri men QR BǴM sheshimi sizdiń ǵylym salasyndaǵy eńbegińiz ben kásibi jetistikterińizdi moiyndaý boldy. Basqarýshy laýazymdardaǵy úlken ómirlik tájiribeńiz ben jumys ótilińiz, ǵylymi jumystar men zertteýlerińiz sizge ýniversitetti jańa deńgeige kóterýge múmkindik beredi. Biz sizge bul jolda belsendi kómektesýge daiynbyz. Sizdi taǵaiyndalýyńyzben quttyqtaimyn, jańa laýazymda jetistik jáne tabysty jumys tileimin», dedi óńir basshysy.
Nurlan Dýlatbekov 1962 jyly Qaraǵandy oblysynyń Aqsý-Aiýly aýylynda dúniege kelgen.
1984 jyly E. A. Bóketov atyndaǵy QarMÝ «quqyqtaný» mamandyǵy boiynsha, 1992 jyly - QR Ǵylym Akademiiasynyń filosofiia jáne quqyq institýtynyń aspirantýrasyn támámdaǵan.
Zań ǵylymdarynyń doktory, professor, QR Ulttyq ǵylymdar akademiiasynyń múshe-korrespondenti, Qazaqstan Pedagogika ǵylymdarynyń akademiiasynyń akademigi.
Pedagogikalyq qyzmetin 1986 jyly Qaraǵandy memlekettik ýniversitetiniń oqytýshysy retinde bastaǵan. Odan keiin osy JOO-nyń zań fakýltetiniń kafedra meńgerýshisi bolyp istegen.
1996 jyldan 2013 jyl boiynsha Qaraǵandydaǵy «Bolashaq» ýniversitetiniń rektory boldy.
Qaraǵandy oblystyń máslihatynyń depýtattyǵyna eki ret sailandy, oblystyq máslihattyń hatshysy boldy
2016 jyldan bastap osy taǵaiyndaýǵa deiin «Nur Otan» partiiasynan VI-shaqyrylymda QR Parlamenti Májilisiniń depýtaty, QR Parlamenti Májilisiniń zańnama jáne sot-quqyqtyq reforma boiynsha komitet múshesi boldy.
Nurlan Dýlatbekov - 200 astam ǵylymi eńbekter avtory. «Dostyq» ordeniniń iegeri.
