Qaraǵandyda kámeletke tolmaǵan qyz balany zorlaǵany úshin 7,6 jylǵa bas bostandyǵynan aiyrylǵan 17 jastaǵy jigit jazasyn qaita qaraýdy surady. Alaida apelliatsiia alqasy úkimdi ózgerissiz qaldyrdy, dep habarlaidy QazAqparat.
Esterińizge sala keteiik, 2020 jyldyń maýsym aiynda Topar kentiniń mańyndaǵy sý qoimasynyń jaǵasynda sottalýshy tanys jasóspirim qyzdy zorlaǵan bolatyn.
Ol kezde jigit mas bolǵan. Qaraǵandy oblysynyń qylmystyq ister jónindegi mamandandyrylǵan aýdanaralyq soty barlyq dáleldemeler men saraptama nátijelerin qarap shyǵyp, sottalýshyny 7,6 jyl merzimge sottady.
«Sottalýshynyń kinási jábirlenýshiniń, onyń zańdy ókiliniń, kýágerlerdiń aiǵaqtarymen, dene jaraqattarynyń bar-joǵy týraly sot-meditsinalyq saraptamanyń qorytyndysymen, biologiialyq jáne molekýlalyq-genetikalyq saraptamalardyń qorytyndylarymen dáleldendi. Jaza taǵaiyndaý kezinde sot zańda tikelei kórsetilgen jeńildetetin jaǵdaidy – sottalýshynyń kámeletke tolmaǵan jasyn eskerdi. Tergeýshi jasaǵan aiyptaý aktisine sáikes aýyrlatatyn jaǵdailar joq. Mundai jaǵdaida sot olardy óz bastamasy boiynsha tanýǵa quqyly emes. QK-tiń 81-babyna sáikes kámeletke tolmaǵandar úshin bas bostandyǵynan aiyrý merzimi 10 jyldan aspaýy tiis», - dep túsindirdi Qaraǵandy oblystyq sotynyń baspasóz qyzmeti.
Jaqynda sottalýshynyń advokaty apelliatsiialyq shaǵym túsirdi.
«Qaraǵandy oblysynyń mamandandyrylǵan aýdanaralyq qylmystyq sotynyń úkimi ózgerissiz qaldy. Sot sottalǵan adamǵa zańda kózdelgen barynsha qatań jaza taǵaiyndady. Úkim zańdy kúshine endi», - dep túsindirdi oblystyq sottyń baspasóz qyzmeti.
