Qaraǵandy oblysynda 10 kún buryn joǵalyp ketken kásipkerdiń bos avtokóligi tabyldy. Er adamnyń ózin izdeý jumysy áli de jalǵasyp jatyr, dep habarlaidy QazAqparat.
Osyǵan deiin habarlanǵandai, 5 qyrkúiekte Qaraǵandy oblysy Jańaarqa aýdanynyń politsiia bólimine Buqar jyraý aýdany Doskei kentiniń 36 jastaǵy turǵynynan aryz kelip túsken.
Áiel 3 qyrkúiekte kúieýi Ómirserik Álimqulov 8.30 shamasynda Mersedes-230 avtokóligimen Nura aýdanyna qarai Shubarkól kentine vahtaǵa shyqqanyn jáne osy ýaqytqa deiin onyń mejeli ornyna jetpegenin habarlaǵan.
Atalǵan fakti Jańaarqa aýdanynyń politsiiasynda tirkelgen. Izdeý jumysy bastaldy.
«12 qyrkúiekte Qarajal qalasy jáne Jańaarqa aýdany politsiia bóliminiń qyzmetkerleri Shalǵy kentinen Jamanaibat kenishine deiingi aralyqta joǵalyp ketken er adamdy izdedi. Izdeýge bes mototehnika jáne jol talǵamaityn 3 kólik tartyldy. Shalǵy aýylynan 50 shaqyrym jerde politsiia qyzmetkerleri joǵalǵan er adamnyń Mersedes – 230 markaly avtokóligin tapty. Kólikke kózge kórinetin zaqym kelmegen jáne buzylmaǵan. Avtokólik esigi qulyptanǵan. Kinologtar, eriktiler jáne politsiia departamentiniń búkil garnizony jumyldyrylǵan izdeý sharalary jalǵasyp jatyr. QR TJM Mi-8 tikushaǵy izdeý aýmaǵyna ushyp shyqty», - dep habarlady Qaraǵandy oblysy PD bastyǵy Erlan Faizýllin.
