1 sáýirden bastap Qaraǵandy oblysynda mektepke deiingi bilim berý uiymdarynyń, onyń ishinde toptaǵy bala sany 25 adamnan aspaityn shaǵyn ortalyqtardyń qyzmeti qaita jandanady. Alaida «qyzyl» aimaqta ornalasqan Qaraǵandy, Priozersk, Shahtinsk qalalary men Ulytaý aýdanynda balabaqshalarda kezekshi toptar ǵana jumys isteidi, dep habarlaidy QazAqparat tilshisi.
Bul týraly jáne mektep oqýshylarynyń tórtinshi toqsanda qalai oqityny jaily óńirlik kommýnikatsiialar qyzmeti alańynda ótken onlain brifingte bilim basqarmasynyń basshysy Gúlsim Qojahmetova aityp berdi.
QR Bas memlekettik sanitar dárigeriniń qaýlysyna sáikes, eger aimaqtar koronavirýstyń taralý qarqyny boiynsha «jasyl» jáne «sary» aimaqta bolsa, onda barlyq oqýshylar oqytýdyń aralas formatyna kóshedi, onda pánderdiń 70% shtattyq rejimde oqytylady.
Ol - matematika, tilder, fizika, himiia, tarih, geografiia, biologiia, dene shynyqtyrý pánderi. Al qalǵan 30% qashyqtyqtan ótedi.
Oǵan informatika, quqyq negizderi, ózin-ózi taný, kórkem eńbek, grafika jáne jobalaý, kásipkerlik pen biznes negizderi kiredi.
Synyptaǵy bala sany 25 adamnan aspaýy tiis.
«Bul oqytý formaty oblystyń Qaraǵandy, Priozersk, Shahtinsk qalalary jáne Ulytaý aýdanynan basqa barlyq óńirine taralady. Al osy tórt eldi mekende sabaqtar ózgerissiz ótedi, iaǵni oqý 1, 2, 3, 4, 5, 9, 11 synyptarda aralas rejimde bolady. 6, 7, 8, 10 synyp oqýshylary qashyqtan bilim alýdy jalǵastyrady», - dedi Gúlsim Qojahmetova.
Oqý protsesi «bir synyp - bir kabinet» qaǵidaty boiynsha uiymdastyrylady. Sabaqtyń uzaqtyǵy - 40 minýt, sanitarlyq talaptardy saqtai otyryp ótkiziledi.
Balalar sabaqqa uqypty jáne yńǵaily kiimmen qatysa alady. Mektep formasy mindetti emes.
«Jasyl» jáne «sary» aimaqta dástúrli oqytý formatymen bilim beretin mektepterde oqýshylar óz synybynda betperdesiz otyra alady.
Dástúrli formatta oqýdy quramynda 300-ge deiin oqýshysy bar, synypta 25 adamnan aspaityn Oblystyń 279 mektebi jalǵastyrady.
Qaraǵandy oblysynda barlyǵy 505 mektep bar, onda 204 499 oqýshy oqidy.
Bilim salasyndaǵy olqylyqtardyń ornyn toltyrý jumysy da jalǵasady. Osy maqsatta sabaqtan tys ýaqytta 15 adamnan aspaityn toptarda jeke sabaqtar ótkiziledi.
Mektepterde yńǵaily keste jasaldy. Sabaq arasyndaǵy ózgerister ártúrli ýaqytta uiymdastyrylǵan.
Barlyq kireberister men shyǵý esikteri ashylǵan, aýysymdar men ishki aýysýlar sany artqan.
Mektep ashanalarynyń, mamandandyrylǵan mektep-internattardyń jáne mektep-internattardyń jumysy aýmaqtyq bas memlekettik sanitar dáriger kelisimi boiynsha jalǵasady.
Erekshe balalarǵa arnalǵan arnaiy mektep-internatta oqý protsesi sanitariialyq talaptardy qatań saqtai otyryp, aralas formatta qaita bastalady.
Basqa qaladan kelgen balalar ata-anasynyń qalaýy boiynsha oqýdy qashyqtan bilim alý formatynda jalǵastyra alatynyn atap ótken jón.
Tehnikalyq jáne kásiptik bilim berýge toqtalar bolsaq, shtattyq rejimde bilim berý kolledjderdiń birinshi kýrs stýdentteri úshin uiymdastyrylady, qalǵany aralas formatta oqýdy jalǵastyrady.
Bitirýshi top stýdentteri úshin shtattyq rejimde diplom jobalary men biliktilik emtihandary boiynsha jeke konsýltatsiia ótkiziledi.
Oqytýdy uiymdastyrý boiynsha suraqtarmen bilim basqarmasyna jedel jeli telefondary: 25-25-02 jáne 8-747-491-12-91, sondai-aq telegram-arna arqyly habarlasýǵa bolady.
